Bansa Penan besebana dipelitik ninting bulan

0

Stuk pemakai ti disadung enda setipak enggau penyampau RM 600 ti diberi perintah, SEB

ENDA PUAS ATI: (Ari kiba), Tejok, Abun, Gereng enggau Polbu mandang ngagai pengarang berita surat sebana pasal stuk pemakai ti dianjung ngagai sida ke enda setipak enggau penyampau RM600.

ENDA PUAS ATI: (Ari kiba), Tejok, Abun, Gereng enggau Polbu mandang ngagai pengarang berita surat sebana pasal stuk pemakai ti dianjung ngagai sida ke enda setipak enggau penyampau RM600.

MIRI: Bansa Penan ari Long Luar, Metalun, Usun Apau, pelieran, Belaga madahka barang pemakai ti beungkus RM600 ke diberi perintah ninting bulan ngagai sida enda setipak enggau penyampau duit nya.

Penyampau stuk pemakai ti diberi ngagai sida enda setipak enggau penyampau RM600 baka ke dipesetuju ti nyadika sukung sementara ngagai sida ari perintah nengeri enggau Sarawak Energy Berhad (SEB).

Jurujaku, Gereng Jadung enggau dua iku agi, Tejok Surek sereta Polbu Jadung madah munyi nya lebuh ke betemu enggau Penyanding Penemu bansa Penan di Murum, Abun Sui Anyit ti mega ketuai PKR Hulu Rajang , ba opis iya di Miri kemari.

Nitihku Gereng, bisi 335 iku bansa Penan nyengkaum 18 buah ruang bilik bansa Kenyah ti kena bungkur Tekat Ai Murum diberi RM850 ke mega nyadika sukung sementara penatai pemisi  ari perintah nengeri enggau SEB.

Ku iya, sida semina nerima mata duit RM250 ari pengari SEB ti disempulang dua iku pemesai polis lebuh ti nyadung duit nya ninting bulan.

Ku iya, stuk pemakai baka ti udah dipesetuju dianjung pemekal ninting bulan tang barang pemakai ke dianjung enda setipak enggau penyampau RM600.

Iya mega madah, ninting bulan stuk pemakai ti dianjung pemekal ngagai penerima ditu kurang ari penyampau RM600.

“Bisi sekeda nya bawang ti udah buruk, pusu enggau sekeda pemakai ti udah mati timpuh, “ ku iya.

Ku Gereng, pekara nya nyadi belama tambah mega pemekal enda meri stuk pemakai nya nitihka bajet RM600 ungkup sebuah ruang bilik.

Ku iya, ba bulan keterubah barang pemakai ti dianjung iya nya beras 10 kg, ba bulan kedua minyak pakai lima liter laluba bulan ketiga 10 kilogram sayap manuk disempulang enggau barang pemakai bukai ti enda setipak enggau penyampau RM600.

“Kami enda puas ati enggau stuk barang pemakai ti dianjung kontrektor, lalu kami minta perintah enggau SEB mutarka penanggul tu,” ku iya.

Berebak  enggau nya, Abun Sui minta perintah nengeri mutarka isu nya enggau jampat laban ngeusahka bansa Penan ti bepanggai ba stuk  pemakai nya pengudah sida dipindah ngagai palan pengetap berumah baru.

Ku iya, berindik ari pengerugi ti ditapi bansa Penan enggau Kenyah ari stuk pemakai nya ninting bulan, sida minta pekara nya diputarka lengkas.

Ba sentang sebana Gereng ti madahka chop ketuai genturung pendiau ti disalah guna seraban orang ke bisi kaul enggau pangawa mekal stuk pemakai nya, Abun ti mega penyanding penemu Bansa Penan madahka diri deka mansik pekara nya lalu minta opis ke bekaul mutarka penanggul nya.