Atur ngungkupka BR1M deka dikemanah: Khalid

0

Nengah kerejasama ejensi ti bekaul, bepelasarka e-Kasih bantu tu patut nguntungka orang ti ditaga

// Dikarang Rengenyan Labang //

KUCHING: Opis Menteri Wang deka ngamanahka atur ngungkupka Bantu Rayat 1Malaysia (BR1M) 2016 nengah kerejasama ejensi tauka piak ti bekaul dikena nentuka bantu nya amat diterima penerima ke endang ditaga begunaka bantu nya.

Sapit Sekretari Bagi Fiskal enggau Ekonomi, Opis Menteri Wang Malaysia, Dr. Khalid Abdul Hamid madah, nya nyengkaum chara mayar sereta nentuka orang ke amat patut nerima bantu nya.

“BR1M tu diberi dikena mantu sereta ngelempung penyeranta lebih agi raban orang ti amat begunaka bantu nya, BR1M tu ukai meransang orang enda gawa.

“Nya alai ba taun ke deka datai, BR1M deka diberi ngagai orang ti amat begunaka bantu sereta bepelasarka lis dalam program e-Kasih.

“Kami deka nempa kerejasama ti menuku enggau piak bekaul baka Kumpulan Wang Simpanan Pekerja (KWSP) enggau ejensi ke bukai, ngambika bantu tu diterima orang ke ditagit tauka ke amat patut nerima bantu,” ku iya.

Khalid ti mega pengelicha Bajet 2016 nerangka pekara nya dalam sesi tanya saut Licha Bajet 2016 ti diatur Opis Pemadah Malaysia ba Auditorium FINAS Kuching ditu, kemari.

Ngenang chara meri BR1M nya iya madah, opis menteri nya agi ngena chara ngemasukka terus ngagai akaun penerima tauka diberi terus ngagai penerima nengah program nyuaka BR1M nya.

“Naka ke diatu kitai agi ngena chara ti dipejalaika sebedau tu iya nya dipasukka terus ngagai akaun, laban kami arap bendar tu ulih ngelempungka tating belanja lebih agi sida ke begunaka belanja pengangkut ke tinggi,” ku iya.

Dalam Bajet 2016, perintah ngungkupka RM5.9 billion ti ulih mantu 4.7 juta ruang bilik enggau 2.7 juta orang bujang.

Kategori penerima BR1M 2016 iya nya ruang bilik ti bepenatai pemisi sebulan ari baruh RM3,000 deka nerima RM1,000 (2015: RM950) lalu ke bepenatai pemisi RM3,001 – RM4,000 sebulan deka nerima BR1M RM800 (2015: RM750).

Kategori Individu tauka orang bujang ke bulih penatai pemisi sebulan RM2,000 ke baruh deka nerima BR1M RM400 (2015:RM350), lalu kategori baru iya nya pesereta dalam lis e-Kasih ke bulih penatai pemisi sebulan RM1,000 ke baruh deka nerima BR1M RM1,050.

Kelimpah ari nya Direktor Opis Pemadah Negeri Sarawak, Abang Sardon Abang Hashim lebuh bejaku ba Majlis Penutupan Rasmi Taklimat Bajet 2015 nya kemari madah, Bajet 2016 nya mungkur semua pekara.

“Bajet 2016 tu mungkur semua pekara iya nya meri peluang ngagai semua rayat ulih ngasaika bajet nya.

“Aku ngarika kami Opis Pemadah ti nyadi tuai rumah program tu, ngarapka semua pekara ti dikenataika pesereta baka bekaul enggau elawin ketuai raban bansa, BR1M, Kedai Rakyat 1Malaysia, BR1M enggau kebukai ulih nyadi input bajet sereta dikenataika ngagai renggat atas,” ku iya.