Taja pan dibantah tang chara Adenan nya muka mata enggau runding semua orang, ku Baru
KUCHING: Chairman Parti Keadilan Rakyat (PKR) Nengeri, Baru Bian muji Kepala Menteri Datuk Patinggi Tan Sri Adenan Satem ketegal pemerani iya ngemendarka Jaku English dikena nyadi jaku rasmi kedua di menua tu, kelimpah ari Jaku Melayu ti ngujungka iya dibantah sekeda raban ari Semenanjung Malaysia.
“Aku muji Kepala Menteri Datuk Patinggi Tan Sri Adenan Satem ketegal pemerani iya mantaika penemu ti deka ngemendarka English nyadi jaku rasmi kedua dikena di menua tu kelimpah ari ngena Jaku Melayu.
“Chara Adenan nya, muka semua mata orang,” ku Baru.
Taja pia, ADUN Ba’Kelalan nya madah, nadai guna enti semua pemutus ti dipadah nya enda dipejalaika.
“Kami ngarapka bisi ubah ukai semina ba siti pekara tu aja tang semua ke lebih agi ari perintah besai ba sentang penemu nya.
“Kitai sama nemu Kepala Menteri bisi tatak ngereja mayuh pekara laban agi bepanggai ba Perintah Besai ngaga semua pemutus,” ku iya.
Iya mega madahka PKR Sarawak sepenemu enggau rayat Sarawak bukai ti ngenggaika jaku Penyanding Penemu Sosio Budaya Perintah, Tan Sri Dr Rais Yatim ti enda setuju enggau pengingin Sarawak ti deka ngena Jaku English nyadi jaku rasmi kedua di menua tu.
Baru madah, Rais enggau seraban gerempung ari Semenanjung nadai hak ngenggaika atur ti dipadah Kepala Menteri Datuk Patinggi Tan Sri Adenan Satem, laban atur nya nitihka Sempekat 1963.
“Siti agi ti patut diperatika iya nya, penemu Rais ti madahka pengawa ngena jaku English nya tau ngasuh rayat menua tu charut tauka pambar.
“Pekara ti ngasuh rayat pambar ke lebih agi di Sabah enggau Sarawak sereta Semenanjung ketegal perintah enda ngemerat kededua menua tu kelebih agi ari sukut pelajar enggau infrastruktur ungkup rayat di menua tu,” ku iya madah ba aum media ti diatur ba Indu Opis PKR ditu, ensanus.
Ku iya, enti kitai ngena jaku English ukai reti nya rayat di menua tu enda patriotik.
“Nya alai aku sigi nyukung pemutus Kepala Menteri tang ba timpuh ke sama mega kami ngarapka nya ukai semina jaku aja lalu perintah nengeri patut ngamatka jaku sida.
“Aku arapka bisi atur ti praktikal agi dikena ngajar Jaku English belabuh ari prasekula. Kitai bisi mayuh orang ke landik ngajar English ari menua luar nengah program besilih pengajar enggau menua tu,” ku iya.
Baru mega meri penemu iya ngambika perintah nengeri ngatur licha sereta ngaga silibus dalam pelajar nya di nengeri tu.