Pemayuh perengka sekula di Sarawak rusak endang suah disebut maya baum
// Dikarang Jacqueline R. David //
KUCHING: Ripot Audit Menua bekaul enggau pengerusak perengka sekula di nengeri tu ukai pekara ke ngenyitka ati kitai taja pan pekara tu seruran dibantaika pengari rayat ari nengeri tu.
Chairman PKR Nengeri Baru Bian madah, pekara nya ukai pekara baru laban seruran disebut belama.
“Nitih penerang dipansutka Menteri Pengintu Pengelantang Pendiau, Orang Indu engga Pemansang Ruang Bilik Datuk Fatimah Abdullah, aku enda tekenyit enggau ripot Ketuai Audit Menua ke madahka mayuh perengka rusak iya nya sesuku sekula di Sarawak.
“Nadai orang tekenyit ninga nya, pelaba aku. Aku empu udah ngabas urung 12 buah sekula di kunstituensi aku empu (di Ba’Kelalan) lalu mayuh ari sekula nya endang balat rusak,” ku iya madah ba aum media ti digaga di Opis Indu PKR ditu, ensana.
Iya nandu, ninting aum kunsil nengeri (DUN) ku iya, pekara nya sigi selalu disebut iya, tang iya madah Perintah Besai baka ke enggai kiruh tauka nadai ati deka mutarka penanggul nya.
“Bejuta ringgit agi belanja deka dikena ngaga Perambu Pemansang Pelajar Malaysia ke taun 2013-2025 ke meri pangka besai, nyengkaum beratika 100 peratus ari sekula mujur nitihka perambu pemun infrastruktur manggai 2015, ke bepun ari Sabah enggau Sarawak”.
“Pekara ke dikumbai ‘Gelombang 1 (2013-2015)’ dalam perambu nya udah abis tang tuju pangka nya, iya nya manggai taun 2013, kereja ngemanahka agi ke semua 1,608 buah sekula enggau pemerat infrastruktur sekula nya baka ke nadai bekau,” ku iya.
Bekait enggau aum Kunsil Nengeri (DUN) ke deka digaga pun bulan Disember tu ila, Baru madahka iya deka mantaika dua usul dalam aum nya.
Antara usul nya, ngambika Perintah Nengeri ngena kuasa autonomi sida iya ngemunaska program Biro Tata Negara (BTN) di Sarawak sereta ngelaika pekara nya enda nyadi pemerat ke nembiak sereta pengereja pengawa opis perintah enggau program BTN.
“Laban BTN nyau limpang ari tuju asal iya nya deka nempa semangat patriotisme enggau pemanah ulah ba raban nembiak Malaysia,” ku iya.