KENA MANAH-MANAH: Nyuak (dua kanan) nyuaka pemeri ari kuchik iya empu ngagai Tuai Rumah Madang ba sebengkah pengerami ti diatur ba Jalai Bletih, ditu empai lama udah.
KAPIT: Kaban Kaunsil Besai Ahli Parti Rakyat Sarawak (PRS), Dato Kristoffer Nyuak udah nyuaka bantu RM1,000 ari kuchik iya empu ngagai Tadika Opis Pemansang Mensia Mayuh(KEMAS)Rumah Madang,empai lama udah.
Kristoffer ti mega Chairman SABEKAS pampang Baleh nyuaka pemeri nya ngagai Tuai Tumah Madang Jelani ba sebengkah pengerami ti diatur ba Jalai Bletih.
Lebuh ke bejaku pandak ba pengerami nya, Kristoffer Nyuak muji KEMAS Kapit laban udah numbuhka tadika di rumah panjai ketegal deka meri awak ngagai nembiak di menua pesisir bulih pelajar tumu.
“Terima kasih ngagai KEMAS Kapit laban udah chakah numbuhka tadika di rumah panjai ketegal deka meri pelajar tumu ngagai nembiak mit di menua pesisir,” ku iya.
Ku iya baru, pengawa numbuhka tadika nya besai amat reti laban meri pelajar ba pekara pelajar ngagai nembiak mit baka macha,nulis enggau ngira.
“Tu nyendiaka sida nelebaka diri besekula berengkah ari Primari Satu.
“Nembiak ti nadai besekula tadika deka tinggal tang nembiak bukai ti udah belajar ba tadika deka nemu macha,nulis enggau ngira,” ku iya.
Nengah awak nya, Tuai Rumah Madang ngenataika pengaga ati iya ngagai Kristoffer Nyuak laban ti udah nyuaka bantu ngagai tadikat.
“Aku mega meri terima kasih ngagai KEMAS laban udah numbuhka kelas tadika di rumah panjai kami ti deka nyadi pelasar endur meri pelajar ngagai nembiak mit sebedau sida belajar ba sekula endar,” ku iya.