KUCHING: Parti Rayat Bersatu (UPP) deka bejadika pampang parti nya di sitak baru DUN, Batu Kitang kena 30 November tu.
Tu betuju dikena parti nyikap diri napi Pengawa Bepilih Besai Nengeri (PRN) ti dijangka deka digaga enda lama agi, ku Sapit Presiden UPP Datuk Dr Jerip Susil.
Iya madah pengawa nya digaga laban beratika sukung ti diberi ngagai parti nya ari mensia mayuh ke diau di sitak nya.
“Kami (UPP) nerima sukung ari komuniti Iban, Bidayuh, China sereta semua pupu bansa ke diau di sitak nya nyengkaum Batu Kitang.
“Nya alai, kami deka muka pampang parti UPP Batu Kitang kena 30 November tu, alai kitai ulih bekerejasama sereta gawa ke komuniti,” ku Dr Jerip madah lebuh bejaku ba atur Pengerami Makai Lemai Pengada UPP pampang Batu Kawa ke-1 ditu, ensanus.
Sama bisi ngulu pengerami nya, Presiden UPP ti mega nyadi Menteri Opis Kaunsil Kandang Menua enggau Pemansang Komuniti Dato Sri Wong Soon Koh, Chairman UPP Pampang Batu Kawa Liu Thiang Leong, Ketuai Nembiak UPP Dr Johnical Rayong Ngipa sereta Penyanding Penemu UPP Temenggong Lu Kim Yong.
Kelimpah ari nya, Dr. Jerip nandu, UPP mega deka ngerembaika pampang nya di sekeda sitak bukai baka Kota Sentosa, Padungan, Pending enggau Batu Lintang.
“Kebuah pia laban kami ngasaika UPP relevan di sitak bukai,” ku iya.
Sebedau nya, Liu madahka UPP nerima sukung ke tegap ari bala nembiak kelebih agi ari pupu bansa China.
Ku iya, bedau lama tu tadi, parti nya udah nerima urung 1,000 iku kaban baru ke tebal agi ari bala nembiak.
“Mayuh sida tu, kala nyadi penyukung Parti Tindakan Demokratik (DAP), tang diatu sida iya nyukung UPP laban sida pechaya ke parti tu,” ku iya.