Enti deka maju, kitai enda tau enda gagit belajarka jaku nya laban iya sebengkah jaku antarabansa
MUKAH: Pengawa ngangkatka Jaku English nyadi jaku rasmi perintah di nengeri tu endang awak ke pemadu manah ngagai nembiak di menua pesisir ngemanahka sabjek nya di sekula.
Menteri Muda ba Opis Kepala Menteri (Pekara Adat Bumiputera enggau Penan) Datuk John Sikie Tayai madah, pengelandik ba jaku nya chukup kurang ba raban nembiak ari menua pesisir.
“Nama utai ke dipansutka Kepala Menteri Datuk Patinggi Tan Sri Adenan Satem endang senutuk enggau singkang nengeri tu ke benung nuju menua maju manggai taun 2030.
“Enti deka maju, kitai enda tau enda gagit belajarka Jaku Inggeris iya nya sebengkah jaku antarabansa ke patut ditemu semua orang di dunya tu.
“Bepun ari diatu, kitai patut ngangkatka jaku nya kelimpah jaku bukai baka jaku asal kitai,” ku iya rambau bejadika Program Nyuaka Setipikit Komuniti 1Malaysia (K1M) Sungai Duan di Rumah Subing, Ladang 4, Jalai Lubok Bukut ditu, kena Hari Dua tu tadi.
Sama bisi datai Pemesai Opis Pemadah Pelilih Tatau Rinta Engkamat, Pemesai Opis Pekara Khas (JASA) Tatau Rohana Abdullah, Chairman K1M Sungai Duan Suwing Mangah, Kaunsilor Chuat Galong, Tuai Rumah Subing sereta temuai ke bukai.
Bela bisi diatur iya nya licha pasal Chukai Barang enggau Servis (GST) sereta Bajet 2016.
Sikie ke mega nyadi Menteri Muda Kaunsil Kandang Menua madah, pengawa ngangkatka Jaku English endang patut diterima semua rayat di nengeri tu.
“Mayuh pemanah nyema kitai ngangkatka jaku tu di nengeri tu. Ukai semina ungkup pekara pelajar kitai tang mayuh agi bidang bukai ke ulih terangkat nyema kitai landik nguna jaku nya,” ku Kaban Kunsil Nengeri (ADUN) Kakus nya.
Ngenang pasal pekara bukai, Sikie minta bala Tuai Rumah patut berani ngeripotka ulah enchuri kayu tauka nebang batang enda beradat di menua sida.
Kenu ku iya, tu ulih mantu piak penerit adat nyaga kandang kampung sida ari terus rusak pia aja.
“Anang nangi tauka takut ngeripotka pekara tu. Adenan udah suah nyebut pekara tu iya nya enggai meda ulah enchuri kayu ngerusak rampa menua kitai di kandang menua pesisir.
“Nengah chara ngeripotka pekara tu, iya sebengkah chara dikena mantu perintah,” ku tandu iya.
Bejaku pasal politik, iya minta rayat di menua pesisir terus tegap nyukung perintah Barisan Nasional (BN).
“Perintah seruran komited deka ngemansangka kandang menua pesisir ngambika ulih sebaka enggau pemansang di mengeri. Sukung ari bala kitai beguna amat dikena nyapai juluk perintah tu, ku tandu iya.