KUCHING: Sarawak deka bulih RM50 juta ari penyampau RM70 juta ti diagih dalam Bajet 2016 ungkup duit jali dikena ngaga rumah panjai di Sarawak enggau Sabah,pia ku Menteri Kebun Bedandang Besai enggau Komoditi,Datuk Amar Douglas Uggah Embas.
Ku Uggah, iya deka betemu Menteri Pengawa Berumah enggau Dagang Temuai Sarawak Datuk Amar Abang Johari Tun Openg ditu ensanus berandauka atur meri duit jali sebedau bejuraika pekara nya ba Menteri Besai, Datuk Seri Najib Tun Razak.
Lebuh bejuraika Bajet 2016, Najib bisi mantaika program baru ti deka dipejalai nengah kerejasama perintah Sabah enggau Sarawak nyendiaka belanja RM70 juta nengah Bank Simpanan Nasional ungkup duit jali nadai bebungai dikena ngaga rumah panjai.
Penyampau maksimum ke tetiap unit rumah panjai iya nya RM50,000, nambah ari RM10,000 kediatu.
Sarawak bisi peneleba sereta pengulih nengah Housing Development Corporation (HDC) bejalaika projek nya di nengeri tu, ku iya madah ngagai Bernama.
Ku iya, duit jali nya deka disedia pun taun baru.
Apin lama udah, Presiden Balai Dagang enggau Industri Dayak (DCCI) Datuk Joseph Salang Gandum meri terima kasih ngagai Najib laban ti udah ngiri pinta kaban parlimen Dayak ti minta penyampau duit jali ungkup pengawa berumah sereta ngaga rumah panjai ditambah.
Salang ti mega kaban Parlimen Julau madahka raban Kaban parlimen Dayak udah betemu enggau Menteri Besai sebedau pengawa bejuraika bajet lalu berandauka pekara ti bekaul engagu bansa Dayak nyengkaum duit jali dikena ngaga rumah panjai ti kelalu mimit dikena mantu peranak rumah panjai ti bepenatai pemisi mit.
Iya mega ngenataika pengaga ati ngarika raban Dayak ti udah diungkupka RM30 juta dikena bejalaika pansik silik bekaul enggau Tanah Adat Bansa Asal (NCR) ngambika mayuh agi geran tanah NCR dikeluarka ngagai bansa Dayak nengah Inisiatif Baru NCR ti dipenyadi dalam taun 2010.
Nya dilempai ari baruh RM115 juta ti diungkupka ‘Program Khas ungkup Bumiputera di Sabah dan Sarawak, nyengkaum ngaga kort anak nengeri di kedua-dua nengeri nya. — Bernama