Ngambika orang bumai, bekebun, betupi enggau berikan ulih besemekih, ngembuan inovasyen sereta nambah pemansut asil sida
// Dikarang Rengenyan Labang //
NAMA BERITA?: Penatai Najib bejadika HPPNK 2015 nerima sambut ti manah ari mensia mayuh ke bisi datai ngagai pengerami nya.
KOTA SAMARAHAN: Orang bumai, bekebun, betupi enggau berikan di serata menua tu diperansang ngemeranka pengelandik,kereban teknologi enggau inovasyen dikena ngangkatka produktiviti ngagai tikas ke tinggi agi.
Menteri Besai, Datuk Seri Najib Tun Razak madah,orang bumai, bekebun, betupi enggau berikan patut ulih ngemansutka diri ari chara lama awakka ulih besemekih sereta ngembuan inovasyen.
Iya madahka menua tu patut beteladankan menua bukai baka Belanda ti besai agi ari Sarawak ulih ba penuduk pemadu tinggi ba pengawa eksport asil betanam betupi dunya.
Orang bumai betanam betupi enggau berikan menua tu tau bechuntoka menua maju baka Jepun, Taiwan, New Zealand enggau Australia ke alai orang betanam enggau betupi sida iya teulihka penatai pemisi tinggi laban ngemeranka teknologi tinggi enggau inovasyen ti ngeluarka produktiviti ke mayuh agi, ku iya.
“Aku ngelalau orang bumai,bekebun,betupi enggau orang berikan kitai, anang agi ngena runding tauka chara lama iya nya nganggap bidang tu semina ke guna diri empu aja.
“Ngarapka semua orang bumai,bekebun,betupi enggau orang berikan di menua kitai ulih ngemeran sereta ngemeratka teknologi enggau penemu pemadu baru awakka ulih ngasil produktiviti ti mayuh agi, baka menua Belanda.
“Orang bumai, bekebun, betupi enggau berikan bejalaika tanggungpengawa besai nyendiaka pemakai ngagai rayat, diatu pan kitai udah betapi enggau pemar laban defisit lebih RM17 billion setaun, reti iya pemakai ti diimport kitai lebih ari ke eksport,” ku iya.
Najib mansutka penemu tu lebuh bejadika pengerami Hari Peladang Penternak ddan Nelayan 2015 ti diatur ba Tengah Laman Dewan Suarah, Kota Samarahan ditu, kemari.
“Rambai jaku Hari Orang Bumai, Bekebun, Betupi enggau Berikan Nasional (HPPNK) ke sekali tu amat senipak bendar iya nya ‘Agroteknologi Pemangkin Traansformasi’ ti enggau juluk deka mai transformasyen bidang agropemakai ngambika lebih moden, dinamik, inovatif enggau ulih besemekih.
Nambahka nya, iya madah dikena ngunukuka pengawa sektor betanam betupi menua tu lebih maju, perintah dalam Bajet 2016 udah ngungkupka RM5.3 bilion.
Program meransang pengawa betanam sayur sereta buah, ngemanahka infrastruktur enggau ke bukai deka terus dikemanah sereta diangkatka agi, ku iya.
Iya madahka rayat ulih ngasaika penguntung pemansang sektor betanam betupi baka nengah progran nurunka rega ti dipejalaika, kelimpah ari deka nambahka 50 buah pasar tani enggau 150 buah agrobazar 1Malaysia di serata menua tu taun baru.
“Di Sarawak aja, bisi empat buah pasar tani baru enggau 10 buah agrobazar rayat 1Malaysia deka ditumbuhka dalam taun 2016.
“Aku meri basa ngagai nengeri Sarawak laban Agrobazar Satok nyadi agrobazar ti manah amat sereta meri mayuh penguntung ngagai peranak mengeri tu, enti ulih kitai deka numbuhka mayuh agi baka agrobazar Satok ba endur bukai.
“Aku arap bendar ukai semina rayat kitai aja ti ulih ngasaika penguntung tang orang bumai,bekebun,betupi enggau berikan mega deka bisi jalai nyual asil enggau produk lalu temuai ari menua tasik mega bisi peluang meli asil tauka produk kitai,” ku iya.
Kelimpah ari nya iya madahka skim padi dalam Bajet 2016, ditambah ungkup belanja RM70 juta input baja ti nguntungka 60,000 iku orang bumai.
“Nengah ungkup belanja tauka skim padi nya kitai ngarap ulih ngangkatka asil beras ti pemadu manah baka beras Bario laban bisi peminta tinggi ari pembeli lalu rega pan mar agi ari rega beras bukai, tu mega ulih nyungkak penatai pemisi orang bumai,” ku iya.
Sama bisi ngulu pengerami nya kemari, Kepala Menteri Datuk Patinggi Tan Sri Adenan Satem, Menteri Bumai enggau Industri Betanam Betupi, Dato sri Ahmad Shabery Cheek, Sapit Kepala Menteri ti mega Menteri Betanam Betupi Moden Datuk Patinggi Tan Sri Alfred Jabu Numpang enggau menteri kabinet bukai.