Baru
Kes TR ari Bekelit ke dijamah seraban gengstar ti diupah sebengkah kompeni patut dipansik jampat
KUCHING: Chairman Parti Keadilan (PKR) Sarawak Baru Bian minta Opis Polis bejalaika pansik enggau silik sentang kes TR Jambai anak Jali ari Bekelit Miri ke bakal ketegal dilantak sereta dijamah seraban gengster kena 26 November 2015 tu tadi.
Seraya madah, ulah ti baka tu ukai pekara ke baru ketegal kes ke sama bisi nuntung TR Surik Muntal di Melikin 2 taun ke udah, Baru minta kes ke bansa tu diketu lalu opis polis patut enda bechiping ba atur pengawa.
“Polis patut mansik enggau silik sereta lengkas sentang ulah jai orang ti diupah kompeni ngambika nyamah TR Jambai.
“Aku enda lantang ati ketegal suah agi polis lengkas bejalaika pansik enti kompeni ngeripot sentang ulah rayat, tang suah lubah bejalaika pansik enti rayat ngaga ripot sentang ulah jai ari kompeni.
“Aku minta sida (opis polis) enda bechiping mansik ulah jai ke udah digaga ba seiku Tuai Rumah ti semina ngenanka tanah diri,” ku Baru nengah seiti surat penerang berita.
TR Jambai napi keruga jai ari raban kompeni berengkah ba taun 2008 lalu kenyau nya iya udah bendar ngenanka tanah diri.
Ba penusah ke nyadi ba jalai nyelawit Pelita Miri di Jalai Miri-Pujut, dua buah entukar pikap dibai gengstar kompeni ngelantak entukar ke ditepan TR Jambai.
Ngenang kaul ke sama Baru ke mega ADUN Ba’Kelalan madah perintah patut meratika baru polisi meri lisin provisional ngagai kompeni kebun dandang besai enti deka meda kes ke baka nya diketu.
Ku iya enda tusah diperetika, peranak asal endang udah lama nguan kandang menua enti dibanding enggau kompeni.
“Kitai enda ulih nyalah peranak asal ngenanka hak sida. Perintah patut mansik sejarah sereta peranak asal ke nguan kandang menua sekalika tanah nya diserangkum sebagi ari tanah NCR sebedau meri lisin,’ ku iya.
Tang baka ke suah, pekara tu enda dikemerat lalu ngujungka peranak asal napi penusah ketegal enda dikeibuh perintah, tandu iya.
Baru nambah, cherita sinu nya udah suah ditandu berari lalu patut diketu sereta anang nganti bisi nyawa sekeda orang midang jemah ila, nya baru perintah deka beratika polisi enggau tusun pengawa sida enggau silik.
“Ulah jai ulun kompeni enggau orang pengempu kompeni enda patut semina dilak pia aja,” ku Baru.
Berebak enggau penusah nya, NGO baka PEDAS udah ngaga ripot polis di pelilih Miri, Bintulu enggau Sri Aman.