Ari 444 di serata menua, 44 digazet di Sarawak

0
KITAI BERATI: Len beratika penerang ke bisi dipandangka ba pemandang TEC 2015, lalu disempulangka Kadim (kiba) enggau sida ke bukai.

KITAI BERATI: Len beratika penerang ke bisi dipandangka ba pemandang TEC 2015, lalu disempulangka Kadim (kiba) enggau sida ke bukai.

Kandang endur tu udah nyadi palan biodiversiti enggau pengeraja asal ke enda tau dikeruga sengapa

Dikarang Rengenyan Labang //

KUCHING: Malaysia bisi 444 kandang endur dijaga penuh sereta enda tau dikeruga ngapa (TPA) nyengkaum 44 kandang endur di Sarawak, dikena ngenukuka biodiversiti enggau pengeraja asal menua balat dikemerat.

Menteri Muda Rampa Menua, Datu Len Talif madah, kandang endur ke dijaga perintah nyangkaum kampung galau endur jelu siga  sereta utai tumbuh enggau idup beridup.

“Berindik ari atur ti ngemeratka pemesai guna nyaga enggau ngibun biodiversiti enggau pengeraja asal, di Malaysia bisi 444 kandang endur udah digazet nyadi TPA baka palan endur jelu, utai idup sereta utai tumbuh beridup.

“Nyentuk seharitu, di Sarawak bisi 44 (ari 444 serata Malaysia) kandang endur dijaga perintah iya nya 30 buah taman negara, 6 buah ‘wildlife santuaries’ enggau 8 ‘natures reserves’.

“Ba kandang endur ke dijaga perintah tu, peluang besai endur raban taksonomi enggau ekologi sereta pemansik ke bukai besidi begiga enggau silik dikena ngemujurka pengawa pemansik, ngerintaika lis enggau ngitung spesis, ‘conservation status’ enggau ngerembaika spesis asal dalam pansik sida,” ku iya.

Len mansutka pekara nya lebuh bejaku seraya bejadika Regional Toxonomy and Ecology Conference 2015 (REC 2015) ti diatur Fakulti Sains dan Teknologi Sumber, Universiti Malaysia Sarawak (UNIMAS) ba sebengkah hotel ditu, kemari.

“Penemu pasal asal spesis tu amat beguna sereta diguna dalam ‘conservation, exploration’ enggau ‘potential utilization’, inovasi sereta dikemansang ngambika ulih nyadi pemakai, ‘pharmaceutical’, ubat enggau guna ke buka.

“Nya alai aku meransang UNIMAS nempa kerejasama enggau ejensi perintah baka enggau Sarawak Forestry, Opis Menteri sereta kebukai bejalaika pengawa pemansik ba kandang endur ke dijaga (TPA)perintah tu, mayuh utai ke ulih dipansik,” ku iya.

Ngenang pasal TEC 2015, iya ngarapka senipak enggau objektif aum besai nya raban pemasik ulih betukar penemu sereta bekunsi peneleba ba pengawav pemansik, ngiga chara mutarka penanggul.

“Kitai deka meda raban taksonomi, ekologi enggau kebukai ti bekaul enggau pengawa pemansik nengah TEC 2015 ulih mantaika penemu sereta nempa kerejasama entara institusi, perintah, gerempung ukai dikuasa perintah enggau sektor peribit.

“Aku temegah ati laban bisi lebih 150 iku pesereta ke nyangkaum ari Indonesia, Brunei enggau United Kingdom bisi nyerata TEC 2015. Ngarapka tiap iku kitai sama bejalaika tanggungpengawa ngenegapka rampa menua tauka ekosistem ke pemanah semua,” ku iya.

Dulu ari nya dalam jaku pengelalu, Naib Canselor UNIMAS Professor Datuk Mohamad Kadim Suaidi madah, TEC 2015 nyadi palan ke pemadu manah endur raban taksonomi, ekologi, pengaga polisi perintah enggau gerempung ukai dikuasa perintah enggau ke bukai ti bekaul berandauka pemar betapi ‘biodiverisity conservation, biodiversity crisis’ enggau ‘taxonimic impediment’ ti ukai nyadi ba Malaysia aja tang mungkur menua bukai.

“Objektif kami ke ngatur TEC 2015 tu ambika bisi endur bekunsi penerang enggau pangan diri dalam bidang taksonomi enggau ekologi nyengkaum chara, bakani ngena kereban enggau chara mansik kelimpah ari ngiga jalai ngenegapka pemasang ekologi enggau ekosistem,” ku iya.

Ba aum dua hari berunggu ti berengkah kemari (1 Disember) nyentuk seharitu (2 Disember), bisi 4 kertas plenary dibantaika, 56 iku pejurai nengah randau lalu 37 pejurai ngena poster.

Sama bisi datai ngagai pengerami bejadika TEC 2015 kemari, Sapit Mandal Chanselor Hal Ehwal Pelajar dan Alumni UNIMAS Professoor Mohd Fadzil Abdul Rahman, Sapit Mandal Chanselor Akademik & Antarabangsa Professor Dr. Wan Hashim Wan Ibrahim, chairman TEC 2015 Professor Dr. Ismail Jusoh enggau ke bukai.