KUCHING: Genap pangku pengawa puang ke bisi di Sarawak endang patut diberi ngagai peranak nengeri tu empu, ku Senator Datuk Dr Sim Kui Huan.
Bejaku ngagai pemberita rambau ngemataka Tanda Singa di Indu Opis Parti Se’ati Rayat Sarawak (SUPP) kemari, iya madah diri berasai nyima pengudah nemu lima iku pharmacist peranak nengeri tu mengkang bedau bulih pengawa.
“Ba bulan Okt 2015 suba kitai bisi 20 iku pharmacist ti baru udah graduet lalu pengawa intebiu udah diatur ungkup sida ba bulan Jan 2016.
“Raban sida tu entara pelajar ke bisi nerima skularship ari JPA lalu dianjung perintah belajar dalam bidang pharmacist.
“Rambau nya lebih 20 pengawa puang ba pekara pharmacist di nengeri tu,” ku iya.
Ngasuh aku alit ati diatu ku iya nambah, dua tiga hari tu bisi nerima lima iti email ari sida ke enda diambi gawa tauka enda mujur diintebiu.
Ku iya, pekara tu enda patut nyadi ba sida ke dianjung perintah belajar ba bidang pharmacist lalu nya patut gawa enggau perintah pengudah graduet.
“Kitai deka nulis surat nuju Opis Menteri Pengerai enggau JPA sentang pekara tu,” ku iya.
Ngenang kaul bukai, Dr Sim madah SUPP deka ngatur pengawa ngelalu temuai di Indu Opis SUPP Jalai Central ba Hari keterubah Taun Baru Cina.
Ku iya pengawa nya ila deka digulu Kepala Menteri Datuk Patinggi Tan Sri Adenan Satem sereta ketuai bukai dalam Perintah Nengeri Sarawak.