NGABAS PENUSAH: Adenan lebuh betemu seraya berandau enggau mangsa bah ti dipindahka ngagai palan pengenduh sementara di Dewan Serbaguna Taman Malihah, ensanus.
KUCHING: Kepala Menteri, Datuk Patinggi Tan Sri Adenan Satem ngelalau mensia mayuh patut nyikap diri tumu dikena napi penusah bah.
Iya lebuh dikerandau maya nemuai ngabas palan pemindah orang tasah bah ba Dewan Serbaguna Taman Malihah ditu, ensanus tepantup ati meda bantu ti diberi ngagai sida nya..
Ku iya, bisi 617 iku betapi enggau penasah bah ba kandang menua Kuching enggau Bau.
Ujan bangat kenyau dua hari ke udah ngujungka sekeda genturung rumah bisi kena bah.
“Kitai ngarapka gaya hari majak manah sereta teduh ujan.
“Taja pia kitai tetap bejaga enggau sebarang penusah bah laban ai pasang raya,” ku iya.
Adenan ke datai ba palan pengenduh sementara urung pukul 4 lemai nya tepantup ati enggau atur pemindah ti dipejalaika sekeda ejensi perintah nyengkaum Opis Bomba dan Penyah Penusah Malaysia (JBPM) Sarawak, Jabatan Penyaga Orang Periman Malaysia (JPAM), RELA, Polis enggau Opis Pengintu Pengelantang Pendiau Raban Bansa (JKM).
“Semua sida ke tasah bah ditu mega bisi nerima bantu pemakai, endur tinduk enggau tikai.
“Nya alai aku deka ngenukuka genap ke sida ke tasah bah nerima bantu ke patut,” ku Adenan.