Asil pengawa dagang ba Bazaar TBC ke-14 di Miri nurun ari taun ke udah

0

MIRI: Taja pengawa dagang di Bazaar Taun Baru China (TBC) ke-14 diatur di Mengeri Besai Miri mandangka pengerichah tang asil iya enda sebaka enggau taun nyin kemari.

Sekeda raban orang dagang enggau penguna maya dirandau madahka pengelubah pejalai ekonomi, pengelemi rega Ringgit Malaysia (RM) sereta pangka Chukai Barang enggau Servis (GST) ngujungka asil dagang sida bisi nurun mimit.

William Kong iya nya seiku pedagang ke bejalaika servis Airbrush Tattoo madahka diri nerima mimit aja peminta enti dibanding enggau taun nyin kemari.

“Chaj servis kelinggai enda niki enggau jampat sereta kami semina ngechaj sida antara RM10 ngagai RM50 bepanggai ba chura enggau pemesai iya.

Nyangka sida tu bejimat enggau belanja diri kelebih agi pengudah pejalai GST. Taun tu kami nyangka teulihka untung mimit aja diumba suwa langkau (bansal) endur bejual nya niki entara RM300 nyentuk RM2000 ungkup sebuah langkau enti dibanding enggau taun nyin kemari,” pia ku William madah ngagai The Borneo Post.

Chin Siaw Chin, seiku agi pedagang ke bejualka bungai madahka pengawa dagang iya semina bisi asil rambau Hari Empat, iya nya hari ketiga bazaar dipejalaika, enti dibanding dua hari keterubah.

“Semina ba luntang dagang kami bisi nyual bungai idup nya baru mayuh digusung mensia mayuh tang penyampau sida ke bebelanja nya bisi kurang enti dibanding enggau taun nyin kemari. Pekara tu nyadi nyangka ketegal GST sereta pengelemi rega duit ringgit,” ku iya.

Taja pia Chin berasai gaga ati laban raban temuai ke bebelika barang datai ari bemacham serak pengidup kelebih agi raban bansa China meruan ngusung gerai iya sereta bebelika bungai idup dikena ngerami Taun Baru China.

Ku iya, chura oren sereta chura mansau terang enggau bungai chura masa nya sereta chura balat dikerindu, tambah mega raban China pechaya chura kayu buah oren kelai pemayuh enggau pengelantang.

Kena nangkup peminta iya mega bisi nyual bemacham bansa bungai ari menua luar ngambika dikawin enggau bungai menua tu lalu diterenak ba kebun bungai sida sebilik di Jalai Riam.

Chin enggau William sekeda ari 260 iku pedagang ke bisi ngambi bagi ba bazaar ninting taun tu ke udah tembu ujung minggu tu tadi. Bazaar tu dibuka berengkah ari pukul 9 pagi nyentuk pukul 10.30 malam.

Bazaar tu diatur Balai Dagang Bansa China Miri begulai enggau Industri (MCCI) sereta Kaunsil Mengeri Besai Miri (MCC) dikena nyungkak ekonomi peranak menua nya kelimpah dikena ngelakuka Mengeri Besai Miri.