SRI AMAN: Sapit Menteri Dalam Menua, Masir Anak Kujat ensana bisi datai ngabas sereta nyuaka bantu ngagai lima pintu ruang bilik ke dituntung penusah angus rumah di Pasar Pantu apin lama ke udah.
Rambau penemuai nya, Masir bisi meri bantu belanja RM1000 ungkup sepintu ngagai sida ke angus rumah.
Ba penusah angus nya ngujungka empat buah kuarters ke dipenggi Opis Kereja Raya retung.
Masir mega bisi meransang sida ke dituntung penusah ngambika kering semengat nempuh penguji ke nuntung.
“Kena manah bantu ke bisi diberi pengari rayat enggau ejensi perintah ditu dikena ngurangka tating penusah,” ku iya.
Kaban Parlimen Sri Aman nya bisi ngelalau mensia mayuh ke bukai sama bejimat maya bekenaka perengka elektrik enggau maya nyumai ba rumah diri empu.
Kenu ku iya, rayat endang patut bejimat lebuh bekena perengka elektrik laban nangika penusah ke enda disadang nyadi.
“Anang enda bejimat maya bekenaka perengka nya. Kemeratka seput diri sebilik maya nguna perengka elektrik tauka lebuh berapi di rumah,” ku iya.
Berebak enggau nya, iya minta ejensi perintah enggau peribit sama besaup mantu ruang bilik ke bisi ditinggang penusah nya dikena mandangka pennyinu ngagai sida.
Bela bisi datai Pemesai D.O Pantu Pantu, Edward Michael Duk, pengari Opis Pelilih Sri Aman, Hamdan Katang, Pemesai Kanan Imigresen Kuching, Nelson Naga, Penghulu Entika Senan enggau Ketuai Raban Bansa ditu.