ARI AKU: Masing ngemasukka pemeri iya ngagai tabung GDB. Ba sepiak kiba iya Gulin enggau bala bukai.
Nya ukai tanggungpengawa ke lempung lalu pemujur GADS ngatur GDB patut dipebasaka, ku Masing
MIRI: Gerempung Gagasan Anak Sarawak (GADS) anang leju meri peransang belama dikena ngenegapka penyerakup ba raban bansa Dayak ngambika seruran likun sereta lantang.
GADS udah mandangka pengulih nya ba taun siti nyin tadi, ke alai komuniti begempung sereta besaup ngemujurka Gawai Dayak Bazaar (GDB), ti alu ngemujurka penyerakup ngagai semua.
“Tu ukai tanggungpengawa ke lempung lalu aku bebasaka GADS laban udah chakah ngempuru bansa Dayak ti pulaika pemaik pengelantang enggau penyerakup.
“Pemutus nya mujur amat, nya alai pajakka mih pengawa meransang belama ngambika meri pemaik ngagai sida ,” Ku Menteri Pemansang Tanah Tan Sri Datuk Amar Dr James Jemut Masing meri peransang lebuh bejaku ba pengerami`Pengerami Makai Lemai Mantar Gawai Dayak Bazaar-2016, ba sebuah hotel ditu kena Hari Minggu nyin tadi.
Berebak enggau nya, Masing berasai gaga ati meda penatai komuniti Dayak ari segenap serak ti ngulu pengerami malam nya, ti nyadika pemaik ngagai penyerakup bansa Dayak.
Lebuh komuniti China begempuru nyambut pengerami Taun Baru China, baka nya mega bansa Dayak begelumu ngenegapka pemereti ati ba pengan diri.
Raban bansa Dayak engka mimit di menua Malaysia tu iya nya urung 3 nyentuk 4 peratus, enti dibanding enggau bansa India enggau China, tang di Sarawak majoriti bansa Dayak bisi 44 peratus ari semua penyampau peranak nengeri tu.
“Taja pia, penyampau 44 peratus nya nadai reti enti kitai seruran pambar belama, lalu mar agi enti kitai ngemendarka diri dipambar ari sukut peneka enggau juluk ati diri,” ku Masing.
Dalam konteks tu,GADS enggau Gerempung Ukai Dikuasa Perintah Bukai (NGO) mangku tanggungpengawa ke besai mai bansa Dayak sama nyingkang ke mua.
Perintah nengeri tampak enda udah ngaku Dayak ukai agi dikategori `lain-lain’, tang sebaka enggau bansa bukai baka Melayu, China enggau India,”ku Masing.
Menteri nya mega muji Gawai Dayak Bazaar (GDB) ti keterubah endar diatur taun siti nyin kemari di Miri, ke lalu meri pemujur ngagai GADS enggau Miri Unity Chapter (MUC) ngepunka pengawa nya, ti keterubah endar di Sarawak.
Iya arap ba ti deka diatur dudi tu ila, ke diperambu dalam bulan Mei, disereta mayuh agi bansa Dayak.
“Enti kita begunaka bantu, aku sedia sereta deka mantu nengah sebarang chara ke ulih,” ku iya.
Beserimbai enggau pengerami nya, Masing lalu meri RM12,000 ngagai wang turu GDB.
Sama bisi ngulu pengerami nya, Kaban Kunsil Nengeri Telang Usan, Dennis Ngau ke mega meri RM8,000 ngagai wang turu nya, presiden GADS Vicky Gulin Shandom, Penyanding Penemu GADS ungkup , Jetli Jelian and David Upe.
Bela bisi datai penyanding penemu pasal undang- undang GADS, Robert Pasang Alam, ti datai ari Kuala Lumpur nyukung pengerami nya.