Penusah ampuh bah ke nyadi di nengeri tu dipelaba majak manah

0

KUCHING: Penusah ampuh bah ti nyadi ba sekeda pelilih menua di nengeri tu agi ulih ditapi sereta dipelabaka majak manah beduduk ari ti bisi baraj di Sungai Sarawak.

Kepala Menteri, Datuk Patinggi Tan Sri Adenan Satem madah, taja pan ai pasang enggau surut disadang deka nyadi dalam timpuh beberapa hari tu, tang dipelaba enda semalat dua hari ke udah laban ujan dipelaba bisi kurang.

“Gaya hari tauka penusah ampuh bah nyau majak manah sereta ulih ditapi, kitai ngarapka ujan majak kurang lalu baraj ulih tan. Enti baraj nadai tentu kitai betapi enggau penanggul besai, ke diatu baraj ti nagang ai nya.

“Bah enda ngeruga serata menua Sarawak, semina di Kuching enggau Serian. Miri enggau Bintulu diatu nadai ujan.

“Ke diatu agi ulih ditapi kitai. Penusah ampuh bah nya udah ngenasahka urung 5,600 iku lalu bisi sekeda ari penyampau nya udah pulai ke rumah laban gaya hari ti manah endur pulai,” ku iya seraya madahka penusah bah ti nyadi diatu enda semalat taun 2003.

Iya mansutka pekara nya ba aum pengarang berita pengudah mendingka licha ari Komiti Penusah Ngenyit Pelilih Mit Kuching bekaul enggau gaya hari sereta bah ti nyadi ba pelilih menua Kuching enggau Serian, ba bilik baum Unit Pengelikun Nengeri Wisma Bapa Malaysia ditu, kemari.

Berebak enggau tu Adenan madahka diri puas ati ngagai bantu ti diberi tauka dipejalaika komiti tauka ejensi ti bekaul ngagai sida ti tasah ampuh   bah.

“Semua opis ti bekaul beserakup  manah bejalaika pengawa baka JKR, Opis Pengemata Gaya Hari, Opis Residen, Opis Pelilih Menua, Opis Pengintu Pengelantang Pendiau Raban Bansa, JPAM, soldadu, Bomba, Polis enggau ke bukai,” ku iya.

Lebuh ditanya sekalika bisi bantu belanja diberi perintah ngagai sida ti kena tasah bah, iya madahka, pekara nya deka diperundingka dulu.

Taja pia bantu pemakai, ai irup enggau ke bukai udah diberi ngagai sida ti pindah ngagai palan pengenduh sementara bah ke bisi dibuka sereta berejista, ku iya.

“Bantu belanja deka diperundingka dudi. Kitai nyelamat sida dulu.

“Kitai deka meda penyampau sida ke diau ba palan pengenduh, sida ke ngerejista diri ba palan pengenduh sementara ke bisi dibuka.

“Bantu ti udah diberi perintah ngagai sida ti tasah bah tu baka pemakai, ai irup, gari enggau ke bukai ti patut,” ku iya.

Nambahka nya lebuh ditanya nama pekara ke deka diatur ngagai sekeda kandang endur ti betapi enggau tanah tusur sereta jalai jai ketegal ujan enggau bah, iya madah, pekara nya deka diputarka enggau naka pengelengkas.

“Pengawa ngemanahka benung dipejalaika enggau jampat kelebih agi jalai ke jai enggau tanah ke tusur. Semua jalai diatu ulih ditengah,” ku iya.

Sama bisi dalam aum pengarang berita nya kemari, Sekretari Perintah Nengeri Tan Sri Datuk Amar Mohamad Morshidi Abdul Ghani, Sapit Sekretari Perintah Nengeri Datu Misnu Taha enggau ke bukai.