Projek JBL deka dipasuk dalam manifesto PRN11

0

Penembu Jematan Batang Lupar tu jemah ulih nyungkak ekonomi rayat ke diau besemak, ku Rohani

Dikarang Jacqueline R. David //

KUCHING: Penembu Jematan Batang Lupar (JBL) jemah deka nyadi jematan ke pemadu panjai di Malaysia, kelimpah ulih nyungkak ekonomi ngagai rayat ke diau besemak enggau nya.

Menteri Orang Indu, Ruang Bilik enggau Pemansang Raban Bansa ti mega nyadi Kaban Parlimen (MP) Batang Lupar Datuk Seri Rohani Abd Karim madah, pekara ke pemadu manah iya nya timpuh pejalai enti udah bisi jematan nya deka pandak agi.

“Naka diatu, enti ngena feri begunaka awak sejam endur mansang aja, udah nya pulai mega sejam. Tang enti udah bisi jematan nya sida ulih mansa sitak Sebuyau, pejalai ulih dikurangka agi ngagai setengah jam.

“Diatu mega nyema bisi kena tinggal feri, sida tepasa nganti nyentuk sejam baru feri bisi datai,” ku Rohani.

Iya madah munyi nya lebuh dirandau ba Pengerami Ngelaluka Pengabang Taun Baru China Parti Sa’ati Rayat Sarawak (SUPP) di Indu Opis SUPP di Jalai Tan Sri Ong Kee Hui ditu, ensana.

Pengawa ke deka ngaga jematan ke pemadu panjai di Malaysia tu iya nya Jematan Batang Lupar bisi dipansutka Menteri Besai Datuk Seri Mohd Najib Tun Razak deka digaga maya iya nemuai ngagai sitak nya apin lama ke udah.

“Suba, aku kala nukik perintah minta digagaka jematan, tang udah nya nyau minta feri, nya kebuah perintah meri feri.

“Taja pia, ba penemuai PM (Menteri Besai) bedau lama tu tadi maya beratika sungai nya, iya ngasaika bisi pemerat ngaga jematan ba sungai nya, lalu projek nya deka dipasukka dalam manifesto BN kena PRN ke-11 (PRN11) tu ila.

“Tu seiti agi berekat ke besai reti ngagai kitai ditu (Batang Lupar) laban tu deka muka mayuh agi peluang pemansang. Enti udah bisi jematan nya, mayuh pemansang bukai ulih digaga,” ku iya.

Iya nandu, nyangka sitak parlimen Batang Lupar ulih nyadi kilang pengeluar pemakai.

“Pekara tu enda ulih dijapai enti nadai jalai, kelebih agi asil betanam betupi enda ulih dibai pansut, kelebih agi sitak Batang Lupar bepengeraja nya enggau asil betanam betupi baka asil pisang, buah jabang sereta mayuh macham asil bukai.

“Ni nemu jemah ila, kitai pan ulih nyadi pengeluar pemakai ungkup menua Malaysia kelebih agi nyadi pengeluar berau (padi dandang besai),” ku iya lalu nandu baru, diatu kitai agi kurang 30 berau, tang enti bisi ‘Umai Padi Dandang Besai Batang Lupar’ Sarawak ulih nyadi pengeksport.

Naka tu, pemesai umai padi ti bisi di sitak Batang Lupar mungkur pemesai 5,000 hektar, ukai semina bansa padi ke dipumai dua kali setaun tang lima kali ngetau dalam kandang lima taun, ku iya.

“MARDI diatu bisi mansik bansa benih padi ke baru ke dikumbai sida iya ‘ Aerobic’ ke semina ngena angin aja, enti sema nadai ai nyadi entali ai kena padi nya,” ku iya.

Sitak Batang Lupar mungkur urung beratus genturung pendiau rumah panjai ke nyengkaum mungkur sitak Kunsil Nengeri (DUN) Batang Sadong enggau Batang Lupar.

“Kelimpah ari nya, mayuh pemanah pengudah bisi Jematan Batang Sadong nya ila, sebagi ari pemerat Perintah Besai baka ke udah dipadah Kepala Menteri, endang gagit deka ngemansangka menua pesisir,” ku iya.