Dikarang Rengenyan Labang //
KUCHING: Mensia mayuh ke lebih agi ti betapi enggau penusah ampuh bah ba sekeda pelilih menua nengeri tu dipinta ngemeratka pengelikun diri, taja pan dalam timpuh dua hari ke deka datai tu pemalat enggau pemayuh ai ujan dipelabaka deka bisi kurang.
Direktor Opis Bomba enggau Penyah Penusah Malaysia Nengeri Sarawak (JBPMNS), Nor Hisham Mohamad ngelalau mensia mayuh ngambika enda kelalu jampat lantang ati meda gaya hari ti majak manah sereta ai bah ti majak surut dibandingka enggau pemalat sereta pemayuh ai ujan kena 7 Februari tu tadi, iya nya 105mm sehari.
Iya madah, nya berindik ari maya tasah bah nya bisi seiku peranak Kpg Tupong Ulu bakal digigit baya ba pah.
“Kemari (ensanus) kitai tekenyit enggau pekara ti nyadi di Kpg Tupong Ulu, lalu baka ti ditemu kitai baya nya agi lepas, nya alai anang enda bejejaga enggau pekara ti baka tu laban pelaba aku jelu baka baya tu enti udah kala ngachau, dipelabaka tentu iya deka nandu ngachau baru.
“Kemari (ensanus) lebuh ke matau sekeda kandang endur ti kena tasah bah ti pemadu ngirauka aku iya nya orang bemain ai, anak mit bemain ai.
“Kitai ngarapka mensia mayuh beratka pekara tu (nyaga pengelikun diri) kelimpah ari nyelamat aset tauka reta tengkira ti pemadu beguna,” ku iya lebuh dikerandau pengarang berita seraya ngarapka nadai sebarang pekara ti enda manah nyadi.
Dulu ari nya, iya ngulu aum enggau licha Komiti Penusah Ngenyit Pelilih Mit Kuching ti sama bisi digulu Kepala Menteri Datuk Patinggi Tan Sri Adenan Satem, ti diatur ba bilik baum Unit Pengelikun Nengeri, Wisma Bapa Malaysia ditu, kemari.
Ensanus, maya pusah ampuh bah ke nyadi urung pukul 10.30 malam, seiku peranak Kpg Tupong Ulu, Shakawi Suhaili, 55, ti benung mindahka kayu di baruh rumah iya, sebedau jelu nya datai lalu nagup iya.
Nambahka nya, Nor Hisham madahka raban Bomba majak chakah bejalaika pengawa mantu orang ti tasah ampuh bah.
Iya madah, raban Bomba ngemeranka strategi renggat tumu iya nya nyelamat sereta nganjung raban Bomba ngagai palan ti kena tasah bah baka Kpg Kudei enggau Kpg Bintawa.
Ku iya, dalam beberapa ari ke deka datai mega raban Bomba mega deka terus besedia mantu mindahka peranak ti kena tasah bah di pelilih menua Kuching ke semak enggau sungai.
“Kami ulih mantu mindahka peranak nya enggau jampat, taja pia aku deka ngelalau anang jampat lantang ari enggau bantu ke kemari lalu kitai ngarapka gaya hari maja manah.
“Kami deka fokus ngagai kandang endur nebing sungai kelebih agi di mengeri Kuching, Kpg Kudei, Kpg Pulo enggau Kpg Bintawa,” ku iya seraya madahka kandang endur di Batu Kitang mega dikemeratka.