Perintah Besai udah nampung konterik nya ungkup timpuh 7 taun agi, ku Nelson
Dikarang Chris Bishop //
KUCHING: Sapit Presiden Parti Progresif Demokratik Sarawak (SPDP) Datuk Nelson Balang Rining ngelalu pengawa Perintah Besai ti udah nampung konterik penerebai bilun MasWings ke Ba’Kelalan ungkup timpuh 7 taun agi.
Jaku puji dikenatai ngagai Perintah Besai nengah Opis Menteri Pengangkut ketegal ti udah sekali agi nyendiaka servis penerebai bilun ungkup peranak menua pesisir di Sarawak enggau Sabah.
“Perintah Besai meretika pinta peranak menua pesisir di Malaysia Timur ke alai sida beguna servis ke mudah lalu penerebai bilun seiti chara ke pemadu jampat dikena mindah ketegal atur penyambung ti bedau digaga,’ku iya nengah sepuchuk surat penerang berita kemari.
Iya ke mega Chairman SPDP pampang Ba’Kelalan ngarap perintah mega meratika gaya palan penyangkai bilun di menua pesisir sereta penyuah servis bilun ke bisi disedia.
Ku iya, kandang endur Ba’Kelalan begunaka mayuh palan penyangkai bilun kelimpah disedia enggau servis penerebai bilun ke suah agi ninting hari.
“Ambika chunto palan penerebai bilun Long Semadoh dikelingi mayuh genturung pendiau ti diuan urung 2,000 iku peranak, tang palan nya udah ditutup berapa taun ke udah.
“Ba Ba’Kelalan aja, kitai bisi penerebai bilun tiga kali seminggu ari Miri lalu servis tu enda tetangkup pemayuh orang ti deka mindah ari Miri ngagai menua pesisir,”ku iya.
Aku minta palan penerebai bilun Long Semadoh dibuka baru lalu penerebai bilun ari Miri ke Ba’Kelalan disedia ninting hari, tandu Nelson.
Dua hari ke udah,Menteri Perengka Pengangkut Datuk Seri Liow Tiong Lai madah, di Kota Kinabalu Perintah Besai udah nampung konterik penerebai bilun MasWings ke menua pesisir di Sarawak enggau Sabah.
Ku iya, nengah konterik nya MasWings ke nyadi anak kompeni Malaysia Airlines diberi sabsidi RM190 juta.