KUCHING: Parti Pesaka Bumiputera Bersatu (PBB) N.18 Serembu dekaka sitak baru nya diberi ngagai parti nya ba pengawa bepilih nengeri Ke-11 (PRN11) ti deka datai.
Kebuah pia ku ketuai pampang nembiak Prem Notes, raban pengawa bepilih PBB mih ke pemadu kering di Serembu enti dibanding enggau parti bukai ari sukut pemayuh kaban parti sereta sukung ti diterima ari nembiak redak.
“Kami dekaka pemesai pemadu tinggi parti enggau Barisan Nasional (BN) nemu kami amat bebendar dalam pekara tu lalu udah gawa bebendar ba sitak tu begulai enggau nembiak redak dikena ngenukuka Serembu nyadi kubu kuat PBB.
“Nya kebuah, kami enda setuju enggau peminta ari parti bukai ba Serembu laban enti nitihka pematut iya endang diempu PBB ti nyadi parti majoriti ba sitak nya,” ku iya.
Prem mansutka pekara nya ba aum pengarang berita begulai enggau raban nembiak sereta raban indu PBB N.18 Serembu ba sebuah restoren ditu, kemari.
“Naka ke diatu, bepelasarka program ti dipejalaika kami ba Serembu baka Jelajah PBB, kami nerima sukung ti amat manah ari rayat enggau pengundi.
“Ambika rikod, PBB Serembu bisi 33 ranting ti dibagi ngagai lapan zon lalu penyampau kaban parti bisi 3,500 iku.
“Parti mega udah muka sebuah opis pengatur pengawa baru ba Pasar Bau ti deka dipenyadi kena 21 Februari tu,” ku iya.
Bekaul enggau pekara nya, semina seiku chalun ti bisi peluang menang ke endang peranak Serembu sereta dikelala ulih bediri minta pilih nengah tiket PBB di Serembu.
Chalun nya mega bisi nerima sukung ari semua raban nembiak enggau raban indu PBB Serembu ti enggai ngelakka sitak nya labuh ngagai parti bukai.
Bepelasarka peratus pengundi, majoriti tauka 75 peratus pengundi di Serembu iya nya Bidayuh, 20 peratus China enggau 5 peratus Melayu.