Pemaik, pengelantang raban veteran ATM dikemerat

0
NAMA BERITA?:  Hishamudin (bediri, empat kiba) benung nanyaka berita seiku veteran ATM ba sebengkah pengerami ke diatur di Kuching malam ensanus.

NAMA BERITA?: Hishamudin (bediri, empat kiba) benung nanyaka berita seiku veteran ATM ba sebengkah pengerami ke diatur di Kuching malam ensanus.

KUCHING: Menteri Penyaga Pengelikun Menua, Datuk Seri Hishammuddin Tun Hussein netap pemaik enggau pengelantang raban veteran Soldadu Malaysia (ATM) di menua tu seruran nyadi pekara ke pemadu dikemerat.

Pekara tu terang dipeda ku iya ketegal pengawa ngintu pengelantang raban veteran seiti entara lima pekara ti dikemerat ba kuing Opis Menteri Penyaga Menua (MINDEF) ungkup taun 2016.

“MINDEF begulai enggau ATM sereta Gerempung Pekara Ex-ATM(PERHEBAT) ngembuan pelin dikena nentu pengawa ngintu pengelantang raban veteran nyadi agenda lumur satu MINDEF nengah embing aku ke nyadi Menteri Penyaga Pengelikun Menua.

“Tu semaya aku lalu ukai semina jaku aja laban kitai enda kala enda ingatka pengawa manah veteran lalu kenyau ari kelia, pemaik enggau pengelantang sida manggai ba ikas ti tau dikemegah,”ku iya.

Iya mansutka jaku nya rambau ngulu pengerami ‘Ramah Mesra Menteri Pertahanan Bersama Warga Veteran Sarawak’ di Palan Aum Borneo Kuching (BCCK) ditu, malam ensanus.

Bela datai Sapit Menteri Penyaga Menua Datuk Mohd Johari Baharum, Ketuai Sekretari Opis Menteri Penyaga Pengelikun Menua Malaysia Datuk Seri Abd Rahim Mohd Radzi, Panglima ATM Jeneral Tan Sri Datuk Seri Zulkifeli Mohd Zain, Presiden Gerempung Veteran ATM Senator Laksamana Tan Sri Mohd Anwar Mohd Nor sereta bala bukai.

Ngenang kaul ke sama, Hishammudian madah penyampau RM2 billion udah dipelanja dikena mayar pinchin enggau bantu pengelantang ungkup raban veteran di serata menua.

Kelimpah ari nya ku iya, program baka ke “1Malaysia Veteran Recognition” ke diatur enggau tuju ngelempung tating belanja raban veteran mega bisi diadu.

Iya nambah program “1Malaysia Veteran Home Repair” dikena ngemanah tauka ngaga baru rumah raban veteran bisi mega bisi disedia.

“Projek mungkur kerjasama rat entara MINDEF enggau opis menteri ke bukai baka ke Opis Menteri Pemansang Menua Pesisir enggau Kandang Menua dikena mantu raban balu enggau veretan ke seranta ngambi sida bisi rumah ke nyamai endur diau,”ku iya.

Ba pengerami nya, Mohd Anwar ba jaku iya madah gerempung udah ngenuku 12 resolusyen nengah Pelin Pemansang Veretan Malaysia nuju MINDEF asil randau ke diadu ba taun ke udah.

Ari 12 resolusyen nya, 10 deka dipejalaika nitihka pemisi belanja perintah ungkup pemaik veteran.

Perintah mega udah ngemendar 50 buah rumah digaga baru enggau 50 buah rumah dikemanah ungkup veretan Sarawak ba taun 2016 nengah Strategi Lautan Biru, ku Mohd Anwar.