KUCHING: Pengundi patut pechaya ngagai Kepala Menteri Datuk Patinggi Tan Sri Adenan Satem terus ngiring nengeri tu ungkup lima taun agi.
Kaban Kunsil Nengeri (ADUN) Engkilili Dr Johnical Rayong Ngipa madah, Adenan begunaka mandat ke tegap endur ngeringka penemu ngenataika pinta kitai di Sarawak.
“Aku enda minta lebih ari kita ke nyadi pengundi, iya nya semina mai kitai begulai enggau aku nempa tim ke kering enggau Adenan baka ke udah disebut ketuai parti lebeih agi maya Pengawa Bepilih Besai Nengeri (PRN) ke dipelaba April tu,” ku iya.
Rayong madah munyi nya rambau pengerami Ketuai Begulai Enggau Rayat di Memaloi Batu 8, Skrang ditu.
Iya madah, atur Adenan mai pangka ke chukup manah ngagai rayat ditu kelebih agi sentang pemaik di menua pesisir.
“Asaika mih sekumbang udah ngiring nengeri tu urung dua taun ke udah, iya mujur bejalaika lebih 45 pengawa ke ngelantangka semua.
Nya alai, iya minta pengundi terus nyukung Barisan Nasional (BN) maya PRN ila.
“Pia mega di konstituensi Engkilili, ba penggal keterubah aku megai DUN tu 2006 suba kitai jauh tinggal tang peda mih sehari tu…pemansang majak nyadi.
“Suba sida ke nadai jalai, udah nyamai dilawa, pia mega perengka bukai baka bekal ai beresi enggau karan benung dipejalaika nengah Langgur Pemansang Malaysia Lumpar ke-11 (RMK11).
“Nya alai, anang arapka petenah penyakal ke landik nguingka penemu kita,” ku iya.
Nangkan nya, Chairman Komiti Pemansang enggau Pengelikun Genturung Pendiau (JKKK) Memaloi, Kaunselor Nyambong Maweng minta pengundi anang jauh ari BN laban semina BN gawa ke rayat.
“Nya alai, aku pechaya pengundi ditu agi ngarapka Dr Rayong ngetanka DUN tu ungkup BN.
“Aku mega ngarapka bala ketuai udah tu ila meri awak ngagai Dr Rayong nyereta kabinet ke baru,” ku iya.
Ba pengerami nya, Dr Rayong madah diri deka ngungkupka geran MRP ngagai JKKK Memaloi penyampau RM25, 200 lalu Biri Indu sida nerima RM7,000.
Sama bisi datai Penghulu Gerang Anchih, Penghulu Inchang Anchih, Chairman Gerempung Tuai Rumah Engkilili (PTR) Kaunselor Sibat Krutap, bala kaunselor enggau bala tuai rumah ke besemak.