Raban kaunselor ditangkan terus meri kerejasama ngagai perintah

0
AGI DISAMBUNG: Mackos benung nyain surat chiri nyadi kaunselor ba mua Entri enggau Anyi.

AGI DISAMBUNG: Mackos benung nyain surat chiri nyadi kaunselor ba mua Entri enggau Anyi.

MARUDI: Bala kaban opis kaunsil kandang menua tauka raban kaunselor ditangkan ngambika terus meri kerejasama ngagai perintah Barisan Nasional (BN) laban sida dipilih ngarika parti gempung BN.

Menteri Muda Rengka Rama (Bekal Ai) enggau Betanam Betupi (Gerempung Orang Bumai), Datuk Sylvester Entri Muran madah, pengawa nyadi kaunselor ukai semina datai baum aja tang patut nemu tanggungpengawa ba genap kandang menua ke dipegai sida.

“Bisi sekeda kaunselor enda nemu nama tuju baum, kebendar pekara ke berat iya nya sida patut nemu tanggungpengawa mai pemansang ngagai menua ke dipegai diri kelebih agi baka di Baram iya nya menua ke chukup besai.

“Tambah mega kita ngarika perintah besai, perintah nengeri enggau Opis Kaunsil Kandang Menua (PBT) ke endang bisi kaul enggau raban kaunselor,” ku iya rambau Pengawa Macha Sumpah Kaunselor Opis Kaunsil Marudi (MDM) di ditu, ensana.

Pengawa nya digulu urung 21 iku kaunselor nyengkaum Pemesai Opis Pelilih Mackos Sibong ke mega nyadi Chairman MDM.

Bisi 29 iku kaunselor udah dipadu lalu tujuh iku enda ulih datai ba pengawa nya.

Berebak enggau nya, Entri minta raban kaunselor terus mai pemansang enggau langgur pemansang maya sida datai baum.

“Pengawa kaunselor ukai nukik pengari rayat,’nama kebuah nadai pemansang’, tang kebendar pengawa kaunselor ke merambu sereta ngemansangka menua diri,” ku iya.

Kelimpah pemansang Jalai Miri-Marudi ke benung dikemanah nengah agih belanja RM77.4 juta, Entri madah pemansang bekal ai mega udah dipasuk dalam rintai Langgur Pemansang Malaysia Lumpar Ke-11 (RMK11) iya nya nyengkaum bekal ai ari Marudi-Poyut/Lubok Nibong ke beungkus RM20 juta, bekal Ai Tinjar–Beluru-Long Lapok ke beungkus RM64 juta, projek bekal ai Tinjar-Lapok Fasa 2 beungkus RM22 juta sereta Projek Bekal Ai Long Lama –Long Laput beungkus RM30 juta.

Nangkan nya, projek bekal ai Kampung Benawa, Long Maro enggau Peking beungkus RM52.5 juta, Long Bemang RM8 juta, projek bekal ai Mulu beungkus RM14 juta enggau Loji Ai Beresi Bario beungkus RM26 juta.

Sama bisi datai Kaban Parlimen Baram, Anyi Ngau sereta Sekretari Politik Kepala Menteri, Robert Laing Anyie enggau Richard Wil Uban.

Nangkan nya, Chairman MDM iya nya Pemesai Pelilih Mackos Sibong sereta sapit chairman, Eda Igar agi disambung kunterik nyentuk bulan Jun taun tu.