Penuduk Ba’ Kelalan ulih diambi baru asal kitai (BN) beserakup sereta badu belaya, ku Adenan
LAWAS: Perintah Barisan Nasional (BN) enda ngeri napi Pengawa Bepilih Besai Nengeri (PRN) ke deka datai, kelimpah ulih menang besai nyengkaum ngerampas baru penuduk Ba Kelalan ke dipegai parti penyakal diatu.
Kepala Menteri Datuk Patinggi Tan Sri Adenan Satem madah, penuduk Ba Kelalan deka pulai baru ngagai BN nyema sebuah parti gempung BN beserakup sereta badu belaya.
“Kitai dalam Parti Pesaka Bumiputera (PBB) enggau BN enda nangi sereta takut napi PRN ke deka datai tu.
“Kitai deka napi PRN enggau penuh pengarap, laban nengah pengandal nya tau menang, nyengkaum ngambi baru Ba Kelalan, asal kitai beserakup sereta badu belaya,” ku iya rambau Program Ngenegapka Komiti Pengawa Bepilih Besai Nengeri Sarawak ke -11 Parti Pesaka Bumiputera Bersatu (PBB) Sarawak pampang Bukit kota, Batu Danau, Bukit Sari enggau Ba Kelalan di Stadium Tertutup Lawas kemari.
Sama bisi datai bini Adenan Datin Patinggi Datuk Jamilah Anu, Speakar DUN Sarawak Datuk Amar Mohamad Asfia Awang Nassar, Menteri Pengeraja Asal enggau Rampa Menua Kedua Datuk Amar Awang Tengah Ali Hasan, Kaban Parlimen Lawas Datuk Henry Sum Agung, Kaban Parlimen Limbang Hasbi Habibollah, Kaban Kunsil Nengeri (ADUN) Bukit Kota Dr Abdul Rahman Ismail, ADUN Batu Danau Paulus Palu Gumbang, enggau komiti tinggi PBB.
Nangkan nya, ku Adenan PBB endang parti ke tegap sereta udah sedia napi PRN ke deka diatur enda lama agi.
Kenu ku iya, pengering ke dikembuan endang asil ari penyerakup parti ke nyadi tulang belakang BN nengeri tu bepelasarka peneleba napi pengawa bepilih besai ngelama tu.
Iya keran minta rayat terus meri mandat ungkup timpuh lima taun agi ngagai iya ngiring nengeri tu.
“Agi mayuh pengawa deka digaga nyema diberi timpuh lima taun agi kelebih dalam ngatur mayuh pekara pemansang di nengeri tu,” ku iya.
Kenu ku Adenan, piak ari iya deka terus berunding enggau perintah besai pasal isu dalam nengeri, undang-undang perintah besai enggau isu minya.
Iya madah, mayuh ubah udah digaga sekumbang iya udah nyadi Kepala Menteru dalam timpuh dua taun.
“Aku deka terus mantu rayat nyengkaum negika hak orang Sarawak lalu enggai meda sida digelar ‘lain-lain’,” ku iya.
Adenan mega nyemetak madah bansa China di nengeri tu enda patut digelar kampar.
“Sida ukai orang datai lalu tu mih menua asal sida laban ditu sida ada sereta besekula,” ku iya.
Berebak enggau nya, ku iya Sarawak mega nadai besekat bejalaika pengawa pengarap tang enda ngelaluka raban orang ke eksterim sereta rindu belaya baka di Malaya.
Nyerumba pengerami nya Adenan madah agih belanja RM500 juta ke dipinta ari perintah besai endang beguna amat dikena ngemansangka menua pesisir baka dikena ngaga jematan Limbang, Bako, Long Lama enggau Sibuti di Sarawak.