// Dikarang Josephine Jata Salih //
BINTANGOR: Institut Pematih Pengajar (IPG) Kampus Rajang udah mujur ngatur sebengkah pengerami ti nyadika kelai beserara enggau Tuan Raymond Gai Panting @ Gaie kena 5 Februari 2016 tu tadi.
Pengerami nya udah digulu semua raban pengelicha, staf enggau pematih pengajar IPG Kampus Rajang udah begempuru ba Dewan Sri Rajang dikena ngepunka pengerami sehari nya.
Ba pun pengerami nya, bala pematih pengajar indu IPG bisi mantaika main asal Iban, iya nya ngajat dikena ngelaluka penatai Tuan Direktor ba foyer Dewan Sri Rajang.
Bala pematih pengajar lelaki mega betabuh ke sida ke indu ti ngajat. Tuan Direktor diiring bala pematih pengajar lelaki ti nebah gendang pampat nyentukka mua panggau.
Nangkanka nya, siku nembiak ari Kus Jaku Iban ti benama Gabriel Guret lalu nyadaka pantun puji ti dituju ngagai Tuan Direktor. Kelimpah ari nya, bala pengelicha mega bisi nibarka jaku dikena ngenangka pemanah sereta pemansang ke udah digaga Tuan Direktor ba IPG nya.
Siti video ti mandangka pengawa ti udah dikereja direktor nya kenyau ari iya keterubah gawa ba IPG Kampus Rajang nyentukka iya pinchin.
Ba pengerami nya mega, Raymond ti udah gawa pengelama 34 taun, (diatu umur iya udah manggai 60 taun) bisi bejaku seraya nyeritaka pejalai pengawa iya kenyau ari nyadi pengajar, prinsipal lalu nyentukkanyadi Direktor IPG.
Raymond udah gawa nyadi Direktor IPG Kampus Rajang pengelama enam taun, iya nya ari taun 2010 nyentuk taun 2016.
Sekumbang nyadi Direktor ba IPG nya, mayuh amat pemansang udah digaga iya, tang ke pemadu nyengala dipeda iya nya IPG Rajang mujur ngatur program Kus Jaku Iban ba taun 2011.
Maya nya sigi pedis deka bejalaika kus nya laban kurang pengelicha enggau kurang kereban sanding, tang ketegal pengeransing ati Raymond Gai, diatu Kus Iban udah entap serta majak mansang lalu mayuh program bekaul enggau Kus Iban udah dipejalaika. Ambika chunto baka Simposium Jaku Iban ti udah diatur ba RH Hotel Sibu dalam taun 2014 enggau Seminar Jaku Iban ba Betong dalam taun 2015 nyin tadi.
Naka ke diatu udah bisi serak ke lima raban nembiak ti belajarka Kus Jaku Iban. Lalu serak ti keterubah deka belabuh ngajar di sekula ba taun baru tu ila.
Pengerami sehari nya lalu diujungka enggau semua raban pengelicha, staf sereta bala pematih pengajar betabi enggau iya semanjai jalai ari Dewan Sri Rajang nyentukka rumah iya.
Siti ari jaku peransang ti disebut iya lalu meri reti ti chukup besai ngagai bala pengelicha sereta pematih pengajar iya nya, “Teaching is the only profession that teaches the other professions and make other professions possible”.
“Things change, time pass but memories remain” Rambai jaku ti dalam bendar reti.