Duta Besai menua China deka meri penemuai basa seraya nerangka sekeda isu ngagai KM

0

KUCHING: Duta Besai China ke Malaysia Dr. Huang Huikang disadang betemu enggau Kepala Menteri Datuk Patinggi Tan Sri Adenan Satem, nerang sentang pengawa kapal perang menua China ti matau semak enggau kandang tasik Beting Patinggi Ali.

Pekara tu dipansutka Menteri Penyaga Menua Dato’ Seri Hishammuddin Tun Hussein ba seiti aum pengarang berita pengudah tembu pengawa meri basa ba Pendam Bujang Berani ditu kemari.

“Kepala Menteri setuju enggau Duta Besai China meri penemuai basa ke nengeri tu ngambi tau nerang sentang pelin sereta tuju sida.

“Aku udah ngasuh panglima soldadu tasik enggau sapit menteri penyaga menua bela ngulu pengawa nya ila.

“Penemuai Duta Besai China tu deka diatur aku empu ke alai pinta tu deka dikenatai aku ngagai Dr. Huang ba pengerami Taun Baru China di Kuala Lumpur malam ila,” ku iya.

Nengah randau entara pengari Perintah China enggau Kepala Menteri nya ila ku iya, dikearap ulih meri pengarap ngagai rayat nengeri tu ngambika isu tu ulih diputar enggau manah.

Ngenang kaul ke sama, Hishammuddin madah naka ke diatu nadai kebuah raban soldadu diguna kena mutarka isu nya ketegal randau nengah atur diplomasi ulih diadu.

Ku iya, Malaysia chukup benasit ketegal ngembuan kaul ti rat enggau kuasa besai baka China sereta Amerika Syarikat.

“Tu mih pengelebih kitai lalu aku pechaya isu tu ulih diputar enggau manah, iya nya meri pemaik ngagai kededua menua.

“Ba penemu aku, kapal menua China enda tama ngagai kandang tasik kitai Malaysia,” ku iya seraya madahka randau diplomasi nya deka diadu Wisma Putra.

Dalam timpuh 3 taun ke udah, kapal perang ari menua China udah matau semak enggau kandang tasik Beting Patinggi Ali, iya nya urung 50 batu nautika ari Miri di Tasik China Selatan.

Kandang nya dulu suba suah endur kapal berikan ari menua Thailand enggau Vietnam tang diatu udah dikuasa kapal berikan ari China.

Ketegal nya mega, orang berikan ari menua tu kelebih agi ari Miri enda berani ngerimbai kandang endur Beting Patinggi Ali ketegal ti suah diemba raban ari kapal perang China.