// Dikarang Alvester Bigol //
KUCHING: Taja udah 18 taun kiruh ngintu, ngibun enggau penuh pengepuh sereta mayuh agi napi pemar bukai tang semua pengiruh nya tetap dikereja seiku indai tunggal Julia Anak Lingoh, 43 enggau penuh penyiru sekumbang ti nyaga seiku ari anak iya, Mayvin Anak Philip, 21 ti enda bepengerai.
Mayvin berengkah ditepan penyakit nyelai maya umur iya manggai 3 taun lalu ngujungka iya lumpuh apus tubuh sereta semina gali aja, lalu iya makai enggau ngirup nengah saup ari indai iya.
Mayuh bengkah chara udah digaga dikena merubat Mayvin tang semua nya nadai ngasi nyentuk iya dikenukuka nyelai pendiau (OKU).
Nitih penerang ke dianjung ngagai Berita Iban apin lama ke udah, sida Julia sebilik asal ari Rumah Raymond Dalang, Kali Bukit Embuas, di Jalai Entabai Julau.
Kenu ku Julia ke mega nupi dua iku agi anak ke bukai, sebedau ditepan penyakit ke nyelai nya. Mayvin ke nyadi anak tuai iya endang ada meruan, bepengerai baka orang bukai.
“Maya terubah kena pemedis nya suba, iya nyabak enggai badu-badu nyentuk iya bisi luput. Maya udah ngeleda, iya dikenukuka OKU ketegal ti kelalu lama nyabak.
“Udah nya, iya lalu enda nemu bejaku tang taja pia iya mereti nama utai ke disebut kitai,” ku Julia dalam penerang nya.
Nengah penerang nya mega, raban Serakup Dayak Sarawak tauka PEDAS bisi datai ngabas sida Julia sebilik. Penatai PEDAS diuluka Presiden iya, Mejar (B) Kapt Colin sereta disempulang bala bukai.
Berebak enggau penemu nya, Sekretari PEDAS, Bill Kayong bisi nyuaka bantu RM430 ngagai Julia dikena ngelempungka tating penusah sida sebilik.
“Kami ari raban PEDAS berasai sinu meda penyiru Puan Julia ke anak iya tu, tambah mega iya kediri-diri nupi bala anak nengah pengawa betanam betupi di rumah panjai sekumbang ke udah sarak enggau laki iya.
“Taja Mayvin bisi nerima bantu ari Opis Pengintu Pengelantang Pendiau, RM300 sebulan tang nya agi enda chukup dikena meli lampin ke ditukar dua kali sehari berindik ari rega barang ke udah niki,” ku Bill.
Ngagai mensia mayuh ke sama bisi penyiru deka mantu ngelempungka tating penusah sida Julia sebilik tau betelefon nuju lumur telefon binching iya empu 0135781804.