Peter John muji inisiatif ti dipejalaika Kepala Menteri

0

Pengeran KM ngangkatka 22 Julai nyadi Hari Merdeka S’wak sereta hari diau bisi disebut iya maya TBC di Miri

// Dikarang Chris Bishop //

KUCHING: Aktivis Sarawak for Sarawakians (S4S) Peter John Jaban ngelalu pengeran Kepala Menteri Datuk Patinggi Tan Sri Adenan Satem ngangkatka 22 Julai nyadi Hari Merdeka Sarawak lalu nyadi hari diau.

Taja pia, iya madahka perintah patut dulu ngamatka inisiatif nya ungkup pemaik peranak nengeri tu.

“Seiti inisiatif ke chukup manah tang Adenan patut ngamatka jaku iya nya. Tu pekara ke berat lalu sigi dianti kitai semua,” ku iya lebuh dikerandau kemari.

Adenan diberita bisi mansutka jaku tu rambau Pengerami Makai Taun Baru China ke diatur Parti Sa’ati Rakyat Sarawak (SUPP) parlimen Miri enggau Sibuti di Miri kena malam Hari Lima tu tadi.

Ku Adenan, pinta nya deka dikerandau enggau Menteri Besai ngambika dikemendar.

Maya 22 Julai 1963 iya nya maya Sarawak teulihka kuasa merintah diri ari British.

Kena 22 Julai 2015, Peter begulai enggau raban aktivis S4S ke bukai bisi ngatur gempuru bebala mayuh di Padang Song Kheng Hai, Kuching  lalu sida mujur matak penatai urung 10,000 iku.

Entara tuju gempuru iya nya minta perintah meri basa sereta ngazet 22 Julai nyadi hari diau di Sarawak.

Ngenang kaul bukai, Peter netapka iya enda deka nyadi chalun ba Pengawa Bepilih Nengeri ke-11 munyika disebut sekeda orang.

Iya madahka diri lantang agi nyadi aktivis lalu nengah chara nya ulih mantu rayat.

“Aku semina bediri ba tengah, enda nyadi chalun lalu lantang ngereja pengawa nyadi aktivis baka ke diatu.

“Aktivis pan ulih mantu rayat nengah mayuh macham chara,” ku iya.

Berindik enggau nya iya enda setuju enggau pengawa raban ketuai sereta orang ti deka minta pilih ari mayuh bengkah parti politik ditu ti udah ngayanka diri rambau musin ampuh bah ngelingi Kuching minggu tu tadi.

Ku iya, sida ari DAP, PKR sereta parti ari serakup Barisan Nasional (BN) dipeda sama bela ayan beambi ulih ari pemerinsa rayat.

“Enti amat sida deka mantu, perundingka mih chara penusah ampuh bah tu ulih diseliahka.

“Pengawa sida ti datai sampal mechah penyerakup tetiap genturung pendiau kelebih agi sida ke tasah ampuh bah,” ku iya.