CHALUN BN DI GEDONG: Adenan (tengah) madah ngagai mensia mayuh iya nya Naroden (tiga kanan) dipilih nyadi chalun BN-PBB di penuduk Gedong maya PRN tu ila seraya dikemataka bala pemesai bukai.
Sida kala mantah penambah 11 sitak DUN baru sereta agih belanja ke dipinta ari Perintah Besai
Dikarang Jacqueline R. David //
SIMUNJAN: Rayat di Simunjan dilalau ngambika terus meri sukung ngagai Barisan Nasional (BN) maya Pengawa Bepilih Besai Kunsil Nengeri ke-11 (PRN ke-11) tu ila.
Kepala Menteri Datuk Patinggi Tan Sri Adenan Satem ngelalau rayat terus meri mandat penuh ngaga BN maya PRN ke-11.
Bedau lama tu tadi, iya udah betemu enggau Tuai Pemegai Menua (TYT) Negeri Sarawak Pehin Sri Abdul Taib Mahmud.
Tuju iya betemu enggau TYT laban minta pemendar ari TYT madamka Kunsil Nengeri, alai TYT udah besetujuka haribulan endur madamka Kunsil Nengeri iya nya kena 11 April tu ila.
“Udah nya barang ku Opis Pengawa Bepilih (SPR) netapka haribulan endur ngantung nama chalun sereta hari ngundi,” ku Adenan.
Iya madah munyi nya lebuh bejaku ba atur pengawa Ketuai Begulai enggau Rayat di Dewan Mesra, Pasar Simunjan ditu, kemari.
Ke sekali tu ku iya, ukai agi 71 penuduk tang 82 sitak DUN deka diperebutka.
“Kami ngasuh SPR nambah penuduk tu ngambika rayat menua pesisir bisi pengari rayat kediri empu lalu enda ibuh bekunsi enggau orang ” “ Datuk Patinggi Tan Sri Adenan Satem Kepala Menteri Sarawak bukai,” ku iya.
Iya madah lima bengkah penuduk nya diempu PBB lalu ke bukai nya di empu parti komponen BN bukai.
“Semilan bengkah penuduk endang ungkup menua pesisir,” ku iya.
Iya nandu baru, maya minta penuduk nya ditambah, Parti Keadilan Rakyat (PKR) mantah ngagai Kort enda besetuju tang Perintah BN ngapil baru, alai pengujung nya, 11 bengkah penuduk nyad kemendarka.
“Enti PKR deka bediri di sitak tu (Simunjan), tanya ngagai sida nama kebuah deka bediri ditu, laban sida kala mantah,” ku iya.
Seiti ari chara kena ngemansangka menua pesisir ku iya, nambah ungkup geran ti diberi Perintah Besai dalam RM500,000.
“Udah nya, Perintah Nengeri minta agih belanja RM500,000 dikena nambahka belanja ke udah diberi Perintah Besai, alai penyampau semua iya RM1 juta.
Tang Parti Tindakan Demokratik (DAP) mantah,” ku iya.
Adenan ti mega nyadi Chairman BN Sarawak sereta ADUN Tanjung Datu madah seraka ekonomi rayat di nengeri sereta menua pesisir patut dirapitka, kelebih agi nengah pemansang infrastruktur.
Kena mandangka pemansang ke udah digaga iya dalam kandang dua taun udah nyadi Kepala Menteri Sarawak, urung 50 pemutus tauka inisiatif udah dipejalaika iya.
Ku iya, antara pemansang nya, ari pom perintah bansa Dayak menua tu ukai agi ‘lain-lain’ alai pom nya diatu udah diubah.
Nangkan nya, bansa China di menua tu ukai orang datai tang rayat Malaysia.
“Lalu pia mega enggau bekal elektrik ke diberi ngagai kompeni menua luar ke beranakka puku ditu.
“Nama kebuah kitai enda meri rega elektrik ke murah ngagai rayat kitai empu.
Nya alai, rega elektrik kitai diatu udah murah,” ku iya seraya nandu, baka nya mega enggau tol ti udah ditutup nyengkaum chaj nepan feri ke semina dichaj RM1 aja.
Ke baru tu tadi ku iya, chukai tanah ungkup pekebun mit ke bisi tanah endur betanam betupi kurang ari 100 ikar dipadamka lalu pupu pintu (agi dipejuraika sereta dalam perambu) mega deka dipadamka.
“Lalu baka nya mega enggau kuasa autonomi menua tu, udah 50 taun dalam Malaysia, nitihka Sempekat Malaysia, kitai deka minta kuasa nya dipulaika baru ngagai Sarawak,” ku iya lalu nandu baru Menteri Besai udah besetuju.
Ba sentang (atur pengawa) ku iya, Sarawak udah mujur ngambi bagi nya pulai baru tang ba royalti minyak taja pan udah dipinta, peratus royalti deka terus di perundingka nyentukka iya mujur.
Seagi-agi rayat menua tu agi milih iya nyadi Kepala Menteri sereta BN, iya madah iya deka negika hak rayat menua tu.
Adenan nandu baru, kaul menua tu enggau Menteri Besai Datuk Seri Mohd Najib Tun Razak enda tau enda manah laban iya antara enam iku menteri besai ke pemadu siruka nengeri tu.
“Ari enam iku Menteri Besai nya, iya udah 49 kali iya nemuai kitu sereta mayuh endar udah ungkup diberi ke kitai, nyengkaum bejalaika projek Jalai Besai Pan Borneo RM16 billion,” ku iya.
Ba atur pengawa nya kemari, Adenan bisi nyuaka setipikit ngagai ketuai raban bansa sereta uniform enggau perengka guna unkup Rela pelilih menua mit Simunjan.
Sama bisi ngulu atur pe kemari, awa nya, bini Kepala Menteri Datin Patinggi Dato Jamilah Anu, Speaker Kunsil Nengeri Datuk Amar Asfia Awang Nassar, Menteri di Opis Menteri Besai Nancy Shukri, Menteri Muda di Opis Kepala Menteri (Pemansang Pengawa Dagang Bumiputera) Datuk Naroden Majais, Menteri Muda Pelajar Teknikal Datuk Julaihi Nahrawi, ADUN Sadong Jaya Ir Aidel Lariwoo, ADUN Balai Ringin Snowdan Lawan sereta sekeda pemesai bukai.