// Dikarang Rengenyan Labang //
SELAMAT DATAI: Penatai Ahmad Zahid enggau Adenan disambut enggau ajat ari bala indu dara.
KOTA SAMARAHAN: Leka jaku ‘Lain-Lain’ ba ruang bansa Bumiputera Sarawak dalam dokumen enggau pom rasmi perintah, dikinsil tekala nya.
Sapit Menteri Besai Datuk Seri Dr. Ahmad Zahid Hamidi Iya madahka pekara nya udah diputus sereta dikemendarka raban Menteri apin lama.
“Aku ti nyadi Menteri Dalam Nengeri, aku udah minta Ketuai Direktor Opis Pengerejista Bansa enggau Direktor Opis Nengeri di Sarawak, tekala nya bejalaika pekara ke dipinta kabinet tu ngambika rayat Sarawak enda agi dikategori ‘Lain-Lain’.
“Tu pekara ti udah dipinta tauka dikedeka rayat Sarawak nengah perintah nengeri lalu menteri sereta sapit menteri dalam kabinet enggau naka pemendar deka ngenukuka leka jaku ‘Lain-Lain’ enda dikena agi,” ku iya.
Ahmad Zahid mansutka pekara nya lebuh bejadika ‘Program Sejiwa Senada 2016’ Bagi Menua Samarahan ke diatur ba palan pengengkah kereta Majlis Daerah Samarahan ditu, kemari.
Bumiputera Sarawak ti enda patut tauka enda tau agi dikategorika ‘Lain-Lain’ nya seiti ari 53 ‘Prinsip & Tindakan’, Kepala Menteri Datuk Patinggi Tan Sri Adenan Satem, dalam timpuh dua taun iya nyadi kepala menteri.
Kelimpah ari nya Ahmad Zahid lebuh ti ngenang pekara bekaul enggau Opis Imigresyen baka isu orang menua luar datai enda beradat (PATI) tauka orang ke gawa nadai pemendar ke nengeri tu, iya madahka perintah besai bebasaka undang-undang ti dipejalaika perintah nengeri Sarawak sereta Sabah.
Perintah besai bebasaka akta imigresyen perintah Sarawak enggau Sabah kelebih agi di Sarawak sereta penerit adat deka chakah agi dipejalaika, ku iya.
Iya madahka peluang sosio-ekonomi enggau peluang gawa di nengeri tu patut diberi ngagai peranak nengeri tu empu,
“Taja pan kitai bisi akta ti bebida tang Opis Imigresyen Malaysia kelebih agi Opis Menteri Dalam Nengeri (KDN) deka nyukung tetiap polisi ti deka dipejalaika perintah nengeri nyengkaum pasal pengawa matau, nyekat tauka nagang enggau nganjung PATI nya ngagai menua asal.
“Nya alai kitai milih Direktor Opis Imigresyen Sarawak ari peranak Sarawak empu ngambika chakah agi bejalaika pengawa ungkup nengeri tu.
“Kami (perintah besai) deka terus meri sukung ngagai Kepala Menteri (Adenan) lalu undang nengeri mega patut dipebasaka,” ku iya.
Sama bisi datai ngulu pengerami bejadika program Sejiwa Senada nya kemari, Adenan enggau bini iya Datin Patinggi Datuk Jamilah Anu, Sapit Kepala Menteri Datuk Patinggi Tan Sri Alfred Jabu Numpang, Menteri ti mangku tanggung pengawa ngatur program Sejiwa Senada ti mega nyadi Menteri Dagang Temuai Datuk Amar Abang Johari Tun Openg, Sekretari Perintah Nengeri Tan Sri Datuk Amar Mohamad Morshidi Abdul Ghani sereta menteri, sapit menteri enggau menteri muda ke bukai.