Dikarang Rengenyan Labang//
KUCHING: Penyerekang penemu entara parti dalam Pakatan Harapan kelebih agi maya pengawa bepilih nengeri (PRN) tu, ngayankan raban nya enda ulih mai pemaik, penegap sereta pengelantang ngagai nengeri tu, kelebih agi Malaysia.
Menteri Kereja Raya Datuk Seri Fadillah madah, berindik ari pekara nya perintah nengeri enggau naka ulih nagang ulah ti enda manah tauka ekstrimis tama kitu.
“(Pekara ti nyadi dalam Pakatan Harapan) enti bisi entara sida iya udah pambar, chura kimpin sida iya mega ulih mambar ukai semina rayat kitai Malaysia tang mega di Sarawak.
“Nya kebuah kitai ngenggaika ulah ti baka nya sereta ngemeratka atur kelebih agi nagang ekstrimis datai ke nengeri Sarawak.
“ Kitai Sarawak deka ngenuku, ngemerat sereta ngetan, keterubah endar pengelantang, kedua penegap lalu ketiga iya nya pemaik, laban enti ketetiga pekara nya ulih ditanka baru kitai ulih fokus ngemansangka nengeri, menua enggau rayat,” ku iya.
Fadillah ti mega Ketuai Raban Nembiak Parti Pesaka Bumiputera Bersatu (PBB) mansutka pekara nya lebuh ditanya bekaul enggau penyerekang penemu Pakatan Harapan rambau PRN tu, ba sebengkah aum pengarang berita ditu, kemari.
“Ari nya enti kitai fokus deka ngemansangka rayat enggau nengeri, baru kitai ulih ngangkatka tikas ekonomi, sosial enggau ke bukai,” ku iya.
Apin lama ke udah, veteran Parti Keadilan Rakyat (PKR) Boniface Willy Tumek udah ningkilka diri ari parti sereta ngelengkaka semua pangku pengawa ke dipegai iya dalam parti.
Boniface ti mega ex- Mandal Chairman PKR Sarawak sereta ketuai PKR pampang Mas Gading madah, iya ngambi pemutus nya ketegal enda lantang ati sereta enda arap agi ngagai iring PKR Pusat.