Program ‘Jelajah Kampus Rakan Muda’ pelasar ngansah pengelandik nembiak

0

// Dikarang Chris bishop //

BISI SAMBUT MANAH: Khairy (dua kanan) meratika sekeda nembiak ti bisi ngambi bagi ba Program Jelajah Kampus di UNIMAS kemari.

BISI SAMBUT MANAH: Khairy (dua kanan) meratika sekeda nembiak ti bisi ngambi bagi ba Program Jelajah Kampus di UNIMAS kemari.

SAMARAHAN: Menteri Nembiak enggau Lumba (KBS) Khairy Jamaluddin kemari ngelanchar ‘Jelajah Kampus Rakan Muda 2016’ di Universiti Malaysia Sarawak (UNIMAS).

Program nya nyadi seiti inisiatif KBS lalu deka diadu di universiti di serata menua.

Ungkup taun 2016, enam universiti udah dipilih endur  program Jelajah Kampus.

“Program tu bepelasarka konsep ngansah sereta mantaika pengelandik raban nembiak ba mayuh bengkah pengawa ke dikerindu ti ulih meri pangka positif ba pekara pemansang diri,komuniti enggau menua.

“Program mega meransang nembiak universiti nyereta gerempung nembiak di menua tu lalu nya seraris enggau ubah ba taun 2018 ti netap sida ke beumur 18 taun ke baruh ditetap dalam kategori nembiak,” ku Khairy ba aum pengarang berita pengudah pengawa ngelanchar kemari.

Tuju program ku Khairy, iya nya meri peluang ngagai nembiak universiti ngaul diri ba program ngansah pengelandik lalu nyadi platform endur mai ‘Program Rakan Muda’ ke dalam universiti.

Ngenang kaul ke sama, Khairy mega madah sepenyampau RM20 juta disedia ungkup program ngansah pengelandik lalu raban nembiak ulih ngenataika pinta bantu nya.

“Kitai minta sida mantaika dulu program ke deka diadu, enti program sigi ulih meri pangka positif, sida deka diberi bantu,” ku iya.

Bantu belanja nya ku Khairy, bepanggai ba program ke diadu lalu agih bantu nya urung penyampau RM10,000 nyentuk RM20,000.

Lima universiti bukai ke dipilih ngatur program Jelajah Kampus iya nya Universiti Putra Malaysia (UPM) Selangor kena 15 Mei 2016, Taylor’s University, Selangor (Julai 2016), Universiti Multimedia (MMU) Melaka (Ogos 2016), Universiti Sultan Zainal Abidin (UNISZA) Terengganu (September 2016) enggau Universiti Utara Malaysia (UUM), Kedah (Oktober 2016).

Program Jelajah Kampus UNIMAS kemari berengkah jari pukul 10 pagi nyentuk 7 lemai, ke alai macham pengawa sereta main bisi diatur.

Entara sekeda iya nya pengawa ngerejista nyadi kaban Rakan Muda, panggau pemerindang, woksyop sereta program Majlis Belia Malaysia.

Bela datai Menteri kereja Raya Dato Sri Fadilah Yusuf enggau Mandal Chanselor UNIMAS Profesor Dato Dr Mohamad Kadim Suaidi.