Enda ibuh mindah ke mengeri ketegal pelajar anak

0
BANTU PELAJAR: Ugak (kanan) nyuaka Bantu Tumu Besekula 2016 RM13,400 ngagai Chairman PIBG SK Nanga Stapang, Jabut Api.

BANTU PELAJAR: Ugak (kanan) nyuaka Bantu Tumu Besekula 2016 RM13,400 ngagai Chairman PIBG SK Nanga Stapang, Jabut Api.

Diatu bemacham perengkaguna di sekula pesisir disikap menyana sebaka enggau sekula di mengeri

KAPIT: Kaban Parlimen (MP) Ulu Rajang, Datuk Wilson Ugak Kumbong ngelalau apai indai di menua pesisir enda ibuh mindah ngagai mengeri ketegal pelajar anak sida.

Ku iya, perintah udah nyediaka awak belajar ke sebaka ngagai semua nembiak di menua tu sema jaku ba mua pintu rumah aja.

“Opis Menteri Pelajar (KPM) nyediaka penyikap perengkaguna sekula ukai semina di mengeri besai aja tang mega ba rumah panjai di entigis. Pra-sekula, sekula primari enggau sekula sekondari digaga dikena nangkup peminta nya.

“Bala pengajar ke ngembuan penau sereta pengelandik dianjung ngajar di semua sekula sekalika nya di mengeri tauka di menua pesisir. Nya alai aku beratika nadai kebuah apai indai mindah ngagai mengeri lalu diau mendam din ketegal pekara pelajar anak sida,” ku Ugak.

Tambah mega ku iya, mindah ke mengeri besai mai mayuh macham pekara rama baka nyuwa bilik, gaya pendiau ke lantang, kurang beratika pejalai sida sereta ke bukai ngujungka mayuh penanggul ke bukai deka malut ke tau ngerusakka pengidup sida jemah.

Sekula di menua pesisir mega bisi disikap enggau buding, warden, penyaga buding, pemantu nembiak sereta ke bukai ti ngemataka pengelikun sida. KPM udah nyediaka mayuh bantu pelajar baka barang pemakai, bantu sekula ba pun taun penyampau RM100, nyali bup, pekayan sekula, kasut, kantung enggau ke bukai.

“Kurang penatai pemisi enda patut nyadika dalih enda nganjung anak sida ke sekula laban JKM udah nyediaka semua bantu ke patut, ku Ugak nerang.

“Aku ngapil minta bala pengajar sekalika jauh tauka semak ngambika ‘ngiru sekula’ kita empu sereta ‘ngiru bala nembiak’ di sekula nya. Beri 100 peratus pemerat ngagai pelajar bala nembiak.

“Enti sema sida enda teulihka pemujur ba peresa sekula tauka peresa perintah, tu deka mai pangka ke enda manah ngagai bala pengajar. Gaya EQ tauka IQ bala nembiak di menua pesisir bela sama lalu pekara ke beguna amat iya nya pengerindu belajar sereta ngiga penemu.

“Jemah ila, lebuh sida udah besai, nyadi mensia ke menyana, sida deka ngenang pemanah budi bala pengajar ke udah nempa penyulut sida,” ku Ugak rambau iya bejadika ‘Program Sarana Ibu Bapa Dan Malam Mesra Zon Subal’ di Sekula Primari (SK) Nanga Stapang, Nanga Gaa’t, Baleh ditu kena Hari Lima tu tadi.

Iya mega ngelalau apai indai ngemeratka pelajar bala anak sida. Bepelasarka statistik, penyampau 52 peratus jam bala nembiak deka diau di rumah. Ba sekula udah nyadi tanggungpengawa bala pengajar nyaga sida tang lebuh di rumah, tanggungpengawa nempa ulah ke manah sereta disiplin anak dilempai ba bau apai indai.

“Ulu ke bala anak maya sida ngulang pelajar, macha bup tauka ngaga kereja rumah lalu matau jam sida belepa,” ku iya ngelalau.

“Sitak Parlimen Ulu Rajang tau dikesema mesai nengeri Pahang. Pengawa ke nyadi pemerat aku iya nya pelajar menua pesisir. Nya kebuah maya dikanggau ngulu pengerami di sekula, aku nadai kala tinggal.

“Tu nyata dipeda alai aku udah ngemendarka agih belanja penyampau RM300,000 dikena ngaga balai mayuh guna di Sekula Sekondari (SMK) Baleh laban sida begunaka pengawa ngemanah penyikap perengkaguna sekula.

“Sehari tu, aku ngemendarka penyampau RM265,000 ngagai SK Nanga Stapang ungkup pengawa ke sebaka. Penyampau RM150,000 kena ngaga jematan, RM50,000 da agi kena ngaga kuarters pengajar ari baruh projek beripai, RM10,000 ungkup PIBG sekula nya, RM20,000 dikena ngemanahka balai mayuh guna, RM30,000 masang irkon ba Bilik Pengajar enggau Bilik Sumber sereta RM5,000 agi ungkup sistem adres mensia mayuh,” ku Ugak.

Iya mega bisi ngemendarka agih belanja ngagai lima buah sekula primari di Zon Zubal, Baleh, iya nya Sekula Primari (SK) Lepong Gaa’t, SK Nanga Kain, Sk Nanga Sempili, SK nanga Entoluh enggau SK Temenggong Koh, Nanga Antawau sepanjai Sungai Baleh alai genap sekula nerima penyampau RM5,000.

Sama bisi bejaku rambau pengerami nya, Kepala Pengajar SK Nanga Stapang, Nyalin Sabang, Pemesai ICT Opis Pelajar Kapit, Mathew Elo, Chairman PIBG, Jabut Api.

Sekeda bala ke bisi datai ngulu program dua hari berunggu tu iya nya Penulung Direktor Opis Orang Gawa, Khuisary Panggas, Pemesai Unit Pengawa Nguruska Akademik Opis Pelajar Kapit, Mohd Mahadi Sofian, bala ketuai opis perintah, ketuai komuniti sereta bala apai indai ke diperansang ngaul diri dalam pelajar bala anak sida sereta bekerejasama enggau piak sekula.