Dikarang Chris Bishop//
MULAIKA PENGINGAT: Najib beratika batu pengingat ke diletak ke diletak apai iya (Tun Abdul Razak) kena 13 November 1966 rambau bejadi Kpg Tun Abdul Razak Triboh maya nya. Bela dipeda Tr Albert Moni (sepiak kanan Najib).
SERIAN: Pengelurus sukung peranak nengeri tu ungkup Barisan Nasional (BN) nyadika kebuah Menteri Besai Datuk Seri Mohd Najib Tun Razak keran deka mantu Sarawak.
“Enda ngira sekalika bansa Iban, Bidayuh, Melayu, Melanau, Kelabit, Penan, Kenyah tauka bansa bukai di nengeri tu, peranak Sarawak merdeka dalam Malaysia.
“Pengari rayat meseti ngintu pemaik rayat. Baka aku ti nyadi Menteri Besai ke ngintu semua ari Perlis nyentuk ngagai Sabah.
“Di Sarawak, baikka nya di Triboh, Ulu Lachau enggau kandang endur bukai, semua nya diintu lalu tu mih penaluk BN,”ku iya ba program ‘walkabout’ di Balai Besai Panglima Kalin, Kpg Tun Abdul Razak Triboh Serian, kemari.
Najib ke nemuai lima hari ke Sarawak berengkah kemari mega madahka diri chukup temegah meda gaya pengidup bemacham pupu bansa rayat ditu.
Di Sarawak ku iya bansa Iban, Bidayuh, Melayu, China sereta bansa bukai begulai idup enggau manah, makai
begulai, kereja begulai, bemain begulai sereta bebini belaki begulai.
“Tu mih formula pemujur BN enggau Malaysia. Ketegal kitai ngakun BN ngarika seiti ruang bilik ke besai lalu ruang bilik tu nyerangkum ari Perlis nyentuk ngagai Sabah.
“Kitai dalam seiti tim ti besai sereta tegap ti ngujungka kitai nadai napi penanggul mai pemansang enggau pengelantang ungkup peranak Sarawak,”ku iya.
Najib mega madah perintah ngembuan agenda ke besai di Sarawak lalu Projek Jalai Pan Borneo mandangka pengeran perintah ti deka mantu rayat.
Berindik enggau nya, iya minta semua rayat nyukung BN ngambika Projek Pan Borneo pemanjai 1100 KM ke beungkus RM16 Biliun ulih digaga enggau lanchar.
Kelimpah ari nya, iya mega madah projek jalai Kanowit-Song-Kapit ke digaga ngena belanja RM150 juta pan benung digaga maya ke diatu.
“Bansa Iban di Baleh, Kanowit enggau di serata nengeri tu tepantup ati ketegal perintah udah berengkah ngaga jalai penyambung Kanowit-Song-Kapit.
“Dalam timpuh lima taun ke deka datai, Adenan ulih ngaga mayuh agi pekara ketegal aku nyukung iya (Adenan) lalu sukung diberi nengah chara meri mayuh agi belanja ungkup Sarawak,”ku iya.
Ba pengerami nya, Najib ngelalau semua ke datai nyukung chalun BN ba N.23 Bukit Semuja, John Ilus ke bela nyempulang penemuai iya.
Ba pengawa nya, Najib udah ngemendarka pengawa ngaga balai besai baru ungkup Kpg Tun Abdul Razak, Triboh nganti ke lama.
Kpg Tun Abdul Razak Triboh dipenyadi apai Najib, iya nya Menteri Besai Malaysia ke- 2, Tun Abdul Razak Hussein kena 13 November 1966, ke alai iya bisi ngeletak Batu Pengingat maya nya.
Bela bisi datai, Kaban Parlimen Serian ke mega Menteri Penguasa Pemayuh Pengereja Pengawa Dato Sri Richard Riot, Chairman Gerempung Iban Remun Serian Eli Luntai, TR Kpg Tun Abdul Razak Triboh Albert Moni enggau orang bukai.