KUCHING: Chalun Barisan Nasional (BN) di sitak bepilih Batu Kawah, Datuk Dr Sim Kui Hian, minta pengundi sitak nya arapka iya nyadi pengari sida di sitak Kunsil Nengeri (DUN) Sarawak ungkup timpuh lima taun ke deka datai.
“Pengelama lima taun ke udah, kitai ditu nadai ngasai pemansang ketegal nadai diberi belanja nengah projek mit menua pesisir (MRP) baka ke diasai rayat di kandang endur bukai.
“Kitai semina ngemata aja…Ditemu kitai, tetiap taun Kaban Kunsil Nengeri (ADUN) BN nerima urung RM1 juta agih belanja MRP lalu enti ungkup timpuh lima taun, agih belanja nya manggai RM20 juta,’ku iya.
Iya mansutka jaku nya ba pengawa bejadi Balai Besai Kpg Desa Wira ke dikemujur Menteri Besai Datuk Seri Najib Tun Razak bedau lama udah.
Ku iya nambah, pengawa ngaga balai besai nya mega asil agih belanja perintah BN ba penyampau RM300,000 ti berengkah digaga bulan Disember 2015 sereta tembu ba pun bulan April tu.
Tu mandangka Perintah BN enda bulaka semaya lalu iya (Dr Sim) deka nguna kuasa senator negika pinta enggau peneka rayat di kandang endur Batu Kawah.
“Aku pechaya enti aku nyadi ADUN, mayuh agi belanja pemansang ari perintah BN deka diberi ngagai kandang endur tu.
“Enti aku diberi peluang, aku deka nentuka lima pekara dalam manifesto dikemujur dalam timpuh lima taun ke deka datai, tu semaya aku,”ku iya.
Lima pekara ke dikemerat dalam manifesto pengawa bepilih Dr Sim iya nya peluang gawa, pengawa dagang, pekara pelajar, perengka pengerai enggau pemansang infrastruktur.
Dr Sim deka nyatup dua iku chalun bukai iya nya penyandang penuduk kenyau ari taun 2011 Christina Chiew (DAP) sereta Liu Thian Leong (chalun ngatika diri).