Dikarang Rengenyan Labang//
KUCHING: Pemutus Kepala Menteri Datuk Patinggi Tan Sri Adenan Satem ti enda ngemendarka sekeda raban orang ari Semenanjung tama ke nengeri tu ketegal tau ngeruga pengelikun enggau penyerakup maya Pengawa Bepilih Besai Kunsil Nengeri Ke-11 (PRN11), endang pemutus ti betul, pia ku Menteri Dagang Temuai enggau Main Asal Datuk Seri Mohamad Nazri Abdul Aziz.
Kebuah pia ku Nazri, raban nya semina datai deka ngeruga penyerakup sereta ngelabuhka Barisan Nasional (BN).
Iya madahka raban parti politik ari Semenanjung Malaysia enda patut malut diri enggau politik di nengeri tu.
“Pemutus Tok Nan ti ngemerat sereta bejalaika kuasa imigresyen di Sarawak baka nagang raban ti ulih mai penyarut sereta ngeruga penyerakup di nengeri tu, endang pemutus ke betul.
“Kitai meda maya bekimpin ke sekali tu endang dipejalaika enggau lantang lalu penyerakup di Nengeri Sarawak mega nadai dikeruga.
Nazri mansutka penemu nya lebuh dipinta ngenang gaya pengawa bekimpin Pengawa Bepilih Besai Kunsil Nengeri Ke-11 (PRN-11), ba sebengkah aum pengarang berita ke diatur ba sebuah hotel ditu, kemari.
Nambahka nya lebuh ditanya bekaul enggau Sapit Presiden Parti Keadilan Rakyat (PKR) Datuk Seri Mohamed Azmin Ali ti diberi timpuh ngagai 2 Mei pansut ari nengeri tu sereta enda dikemendarka datai kitu nyentuk ngagai 7 Mei, iya (Nazri) madah, nya pekara ke betul dipejalaika perintah nengeri.
Ku Nazri, penatai Menteri Besai Selangor nya semina deka ngelabuhka Barisan Nasional maya bepilih tu.
“Iya datai kitu ke bendar nadai utai disukung, sida semina deka ngachau runding rayat sereta mega beserakup deka ngelabuhka perintah BN.
“Enti sida amat deka numbuhka perintah lalu datai bediri minta pilih tang sapa kepala menteri sida, nya udah nyata bendar penatai sida kitu deka ngachau sereta ngelabuhka chalun kitai (BN) ngena isu ti tau ngasuh begedika ba pupu raban bansa, ti ulih ngeruga penyerakup ti udah ditempa beratus taun.
“Aku ngarapka perintah nengeri Sarawak, anang mendingka jaku sida, peda nama utai ti udah kereja di Semanjung din, enda ngetu nyentukka diatu,” ku iya.