SIBU: Gerempung Pengintu Pengelandang Bansa Dayak Sarawak (PKDBS) mujur ngatur Aum Besai Ninting Taun (AGM) bepalan ba Rumah Penghulu Paing Tawi, Jalai KJD-Durin ditu, apin lama ke udah.
Dipelabaka urung 2,500 iku temuai bisi datai nyengkaum kaban ari serata nengeri tu ngulu AGM nya ke betuaika chairman iya empu Datuk Joseph Unggu.
Kelai AGM PKDBS nya dipungkal enggau pengawa Miring dipejalaika Joseph ke mega nyadi Chairman PKDBS seraya dikemata kaban komiti besai PKDBS.
Tu ditangkan pengawa mandangka main asal Iban nyengkaum ajat enggau Kuntau.
Pengudah AGM, Joseph nyuaka pemeri ngagai Rumah Seri Kenangan Sibu diarika prinsipal iya, pemeri ari kuchik iya empu ungkup nembiak ke nyulut dalam peresa UPSR, PMR enggau SPM 2015.
Maya AGM nya, Joseph mega madahka penumbuh ‘Yayasan Kebajikan Dan Ekonomi Dayak Sarawak’ nengah buah penemu PKDBS.
Dikena ngemujurka penumbuh nya, Kompeni Sinarharta Global bisi meri bantu RM100,000 ngagai Joseph ke mega nyadi Chairman Yayasan Kebajikan Dan Ekonomi Dayak Sarawak.
Pengerami nya richah nyentuk ke malam nengah program ke dikumbai Malam Bekelala enggau PKDBS sereta digulu urung 500 iku peranak rumah panjai ke besemak.
Penanyi tebilang Iban ke bisi dikangau datai merindang malam nya Swaylin enggau Eddie Kuwing.