Polisi, perambu BN ngubah idup bansa Penan

0

Penemu orang luar ke ngumbai bansa sida tu agi tinggal arus pemansang kebendar enda betul

DIKERINDUKA RAYAT: Najib benung betabi enggau mensia mayuh ke ngambat penatai iya di rumah panjai Mareng Penan di Suai, Niah kemari. — Gambar Bernama

DIKERINDUKA RAYAT: Najib benung betabi enggau mensia mayuh ke ngambat penatai iya di rumah panjai Mareng Penan di Suai, Niah kemari. — Gambar Bernama

MIRI: Datuk Seri Najib Tun Razak madah jaku orang luar ke ngumbai bansa Penan agi tinggal pemansang kebendar enda betul laban bansa sida tu diatu ngasaika penyamai idup asil ari ibun intu perintah Barisan Nasional (BN).

Menteri Besai madah, tu terang mandangka polisi enggau perambu pemansang serap dibai BN nadai ngemeluka sebarang bansa tauka raban ari ngasaika arus pemansang moden.

Najib madah diri ningkah penemu Bruno Manser, ke ngumbai diri negika hak bansa Penan di Sarawak, pasal bansa nya agi mindah kin kitu, ngena chawat sereta tinggal ari arus pemansang menua.

“Nya enda betul. Aku empu meda pengidup sida udah moden,” ku iya bejaku ba mua 2,500 iku mensia ke ngulu Program Ketuai Begulai Enggau Rayat di Rumah Panjai Mareng di Suai Niah, kira 135km penyauh ari tu.

Rumah panjai 36 pintu nya nyadi rumah panjai moden keterubah digaga ungkup komuniti Penan ke dipelabaka bisi 18,000 iku di serata Sarawak.

Penan iya nya sebengkah bansa dalam raban etnik Orang Ulu. Najib madah, nengah bantu enggau peluang ke diberi BN, pengidup bansa sida tu bisi belinsur nyentuk bisi nembiak ari raban bansa sida iya udah mujur tama universiti.

Najib mega muji pengulih Ketuai Raban Bansa Penan Sarawak, Datuk Temenggung Hasan Sui, ke bisi ngulu program nya ke dikumbai iya nyadika chunto entara bansa Penan ke udah mujur.

Bela bisi datai chalun BN Kemena, Datuk Dr Stephen Rundi Utom enggau chalun BN Samalaju, Majang Renggi.

Ba program nya, Najib madahka agih belanja RM1 juta deka diberi dikena ngemanahka perengkaguna di rumah panjai Mareng Penan.

Agih belanja RM200,000 mega deka diberi ngagai Gerempung Bansa Penan ungkup pekara pelajar anak sida.

Kelimpah ari nya, Najib mega bisi nyuaka surat pemendar Skim Lon Rumah Panjai ungkup 34 pintu peranak rumah panjai Mareng Penan enggau peranak rumah Ngipa Tinggang ke bisi 89 pintu di Sebauh, Bintulu.

Berebak enggau nya, Rundi madah, menteri besai seruran mendingka sebana bansa Penan enggau rayat Kemena ukai semina maya pengawa bepilih besai.

Iya ngarapka menteri besai terus beratika penanggul di menua pesisir baka perengka bekal ai beresi, karan enggau jalai.

Hasan Sui, seiku orang kaya bansa Penan, madahka, taja etnik Penan enda mayuh tang sida tetap nyukung Najib terus ngiring menua tu. — Bernama