Semina chalun tim Adenan aja ngarika Barisan Nasional

0

Rayat dilalau anang pechayaka jaku chalun ngatika diri (Peter Nyomek) ti ngambu madahka diri ngarika BN

// Dikarang Chris Bishop //

BAU: Kepala Menteri Datuk Patinggi Tan Sri Adenan Satem nyemetak netapka Barisan Nasional (BN) nadai nyabung chalun ngatika diri ba Pengawa Bepilih Besai Nengeri Ke-11 (PRN11).

Berindik enggau nya, iya ngelalau semua rayat anang pechayaka jaku sekeda chalun ngatika diri ti madah ngagai rayat ke alai sida ngarika BN, baka ke nyadi di sitak N.18 Serembu.

Ba pengerami ketuai begulai enggau rayat di Balai Besai Kpg Bijuray Mongag, Krokong Bau kemari, Adenan madahka BN nyabung chalun terus Miro Simoh ba penuduk baru nya, lalu tiga iku chalun bukai ke bela ngerebut penuduk nya ukai chalun BN.

“Aku deka nerangka pekara tu enggau silik, pendingka jaku aku. Anang Dikemula Peter Nyomek ti madahka diri mega chalun BN. Peter ukai chalun ngarika BN.

“Aku ke nyadi Chairman BN Nengeri mega ketuai lumur satu BN deka ngelalau iya (Peter) anang ngemulaka rayat ke alai iya deka nyereta BN enti menang.

“Maya ke diatu bisi 82 penuduk kunsil nengeri deka diperebut lalu aku pechaya ulih menang ba 70 iti penuduk. Kitai enda  begunaka Peter nyereta BN,” ku Adenan.

Kelimpah Miro, sitak N.18 Serembu mega dikerebut Dato Peter Nyomek anak Nyeap (ngatika diri), Ahtina Sim (PKR), Buln Peter anak Rebos (STAR).

Adenan nambah, sigi bisi dulu agi ari tu chalun ngatika diri diterima nyereta BN pengudah sida menang bepilih, tang pekara nya enda deka nyadi seagi iya nyadi Chairman BN Nengeri.

Ba pengawa nya mega, Adenan ngelalau Peter badu ngemulaka rayat lalu enti amat iya bisi sukung kena mih nama diri empu.

“Nuju Peter aku ngelalau, anang nguna nama orang bukai. Semina bisi seiku aja chalun BN lalu iya diatu bediri ba mua kitai semua.

“Ingatka jaku aku kita semua, sehari tu 30 April 2016 jam 3:15 lemai, sigi enda…kitai enda nerima chalun ngatika diri nyereta BN,” ku iya.

Ngenang kaul ke sama, Adenan pechaya Peter sanggup bediri ngatika diri ngelaban BN ketegal ti ensiban enda dipilih ngarika BN ba penuduk nya.

Bisi mayuh kebuah orang bediri ngatika diri lalu ba kes Peter ku Adenan, iya bediri ketegal ati ti ensiban lalu diatu madah ngagai rayat deka negika pemaik rayat.

Ke amat iya deka negika pemaik diri, tandu Adenan.

Nangkup pinta Ketuai Genturung Pendiau (KK) Kpg Bijuray Mongag Piray Sikam, Adenan ngagihka RM500,000 ngambika tau dikena ngemanah Balai Besai.

Bela bisi datai Kaban Parlimen (MP) Puncak Borneo ke mega Sapit Menteri Kuasa, Teknologi Gadung enggau Ai, Dato Sri James Dawos, Menteri Pemansang Infrastruktur enggau Penyambung Dato Sri Michael Manyin enggau orang bukai.