Jabu tetap kiruh bekimpin taja nadai bediri ba PRN11

0

KUCHING: Sapit Kepala Menteri Sarawak Datuk Patinggi Tan Sri Alfred Jabu Numpang meruan kiruh bekimpin taja enda bediri maya Pengawa Bepilih Nengeri ke-11 (PRN-11), ukai semina ngagai Barisan Nasional (BN) aja tang mega ungkup pemansang nengeri tu.

Sapit Presiden Parti Pesaka Bumiputera Bersatu (PBB) tu enda muai awak bejuraika pekara ke bekaul pemerat nengeri enggau rayat Sarawak enggau penatai mayuh ketuai Perintah Besai di nengeri tu nyerumba PRN-11.

Pekara ke suah dibantaika iya bekaul enggau pemansang di menua pesisir sereta agih ke mayuh agi kena ngemansangka kandang menua nya.

Rambau Sapit Menteri Besai Datuk Seri Dr Ahmad Zahid Hamidi bejadika Opis Mikro Opis Menteri Dalam Menua (KDN) Bario tiga hari ke udah, Jabu dalam jaku dipansutka iya minta Palan Transformasyen Menua Pesisir (RTC) ditumbuhka di kandang menua nya.

Tu dikena ngemuntangka peranak menua bukit Bario adap Timur Tasik Sarawak ulih ngasaika bemacham servis ari perintah enggau peribit berindik ari pejalai ari kandang menua nya ngelawa mengeri kelalu jauh, lalu pejalai 15 jam pengelama enti nengah jalai darat ngelawa Miri. Iya mega minta perintah besai ngagihka pengabis nadai RM1.5 juta kena ngemanahka sekeda jalai batang ngelinggi Bario, laban peranak menua nya tusah deka mindah.

Ahmad Zahid udah ngemendarka peminta nya rambau pejalai gawa ngagai kandang menua majoriti bansa Kelabit nya, enggau ngemendar Opis Mikro KDN nya deka diangkat nyadi RTC.

Kelimpah ari nya perintah mega nyediaka belanja penyampau RM2 juta dikena ngemanahka jalai di kandang menua majoriti bansa Kelabit nya.

Pengudah ngemendarka pekara nya, Jabu lalu mansang merap Ahmad Zahid ke benung bejaku, ngenataika pengaga ati iya.

Jabu dalam jaku dipansutka iya mega madahka taja perintah udah nyediaka bemacham perengkaguna ungkup komuniti menua pesisir baka bekal elekterik enggau ai, iya agi apin chukup.

Iya mega madahka bala nembiak ari kandang menua pesisir Sarawak, mayuh sida ke pintar sereta tebilang, nyengkaum ari Bario.

“Sida ngembuan pelajar tinggi. Sida belajar bebendar sereta gawa bebendar enggau mega pintar. Kualiti peranak menua pesisir kekadang sama, enda jauh manah ari sida di mengeri. Kami pechaya ngagai pekara nya, beri mih sida awak,” ku iya.

Antara peranak asal Bario ke mujur iya nya Menteri ba Opis Menteri Besai Datuk Seri Idris Jala ari bansa Kelabit, sereta kala gawa nyadi Direktor Pengatur Pengawa enggau Ketuai Pemesai Eksekutif MAS. — Bernama