KUCHING: Menteri Besai Datuk Seri Mohd Najib Tun Razak chukup positif rayat Sarawak deka ngundi Barisan Nasional (BN) kena 7 Mei 2016 tu.
Bejaku rambau ngelanchar Projek Pemansang HIKMAH Exchange di Jalai Haji Taha kemari, iya madah sukung nya ulih diasai ari gaya mua rayat ba tetiap pengerami ke digulu.
“Ari gaya mua sereta asai tabi jari rayat ditu, aku chukup positif sida deka ngundi BN,’ku iya.
Pengerami kemari bela digulu Menteri Dagang Temuai ke mega chalun BN di Satok Datuk Amar Abang Johari Tun Openg enggau chalun BN di Tupong Fazzaruddin Abdul Rahman.
Najib ke nyadi Chairman Barisan Nasional (Menua) nambah sukung pemadu tegap ungkup BN nya chukup beguna dikena nentu pemansang ke udah ditusun di nengeri tu ulih dikemujur.
Ku iya nambah, pemansang ke udah ditusun sigi ungkup pemaik rayat ke alai agenda ngemansang bansa Bumiputera seruran nyadi pekara dikemerat dalam polisi perintah BN.
Muji Yayasan Hartanah Bumiputera Sarawak (YHBS) ti udah ngepunka projek ngaga HIKMAH Exchange, Najib pechaya pengawa nya ulih ngeransingka bansa Bumiputera ba pekara dagang kelimpah ti tau ngenanka tanah Melayu ke di dalam kandang mengeri.
“Aku pechaya nengah projek tu bansa Bumiputera tau teulih aset ke strategik sereta penguntung ti tau ngemantupka ati.
“Enti tu mih ke batang tuju, kitai sedia mantu sereta nambah belanja jemah ila,’ku iya.
Beambika chunto Projek Jalai Pan Borneo, iya madah ari penyampau belanja RM16 biliun, setengah iya nya RM8 biliun diungkupka ngagai kuntriktor bansa Bumiputera.
Tu mih juluk kitai dalam agenda pemansang Bumiputera perintah BN, tandu Najib.
Bela bisi datai bini Najib, Datin Seri Rosmah Mansur, Kepala Menteri Sabah Dato Sri Panglima Musa Aman, Menteri Kereja Raya Dato Sri Fadillah Yusuf, Sekretari Besai Perintah Nengeri, Datuk Amar Tan Sri Mohd Morshidi Abdul Ghani enggau orang bukai.