SIBU: Raban nembiak maya hari tu dipinta landik mida pekara ke manah enggau ke enda patut ditunda baka ke bisi dibantai ba laman rama.
Sapit Menteri Pengetan Pengelikun Dato Sri Mohd Johari Baharum madah, ulah ti kelalu terunda meda pekara ke enda manah ba laman rama tau bendar ngenataika penusah nyengkaum ngagai pengelikun menua tu empu.
“Kitai patut berasai temegah ati laban taja menua kitai mit tang menua bukai bebasaka kitai laban kitai udah lama likun taja diuan pupu raban bansa.
“Kitai ngarapka bala nembiak ulih ngembuan ulah ke manah ba diri empu,” pia ku iya madah.
Iya mantaika jaku tu maya ngulu ‘Program Ramah Mesra Bersama Briged Sukarela Khidmat Negara (BSKN) Dan Pelatih Program Latihan Khidmat Negara (PLKN) 2.0’ ba Kem Bumimas ditu, lemai kemari.
Kelimpah ari nya, Johari mega ngarapka PLKN ulih ditandu ba taun-taun ti deka datai bepun ari tuju program nya beguna dikena nempa ulah ke manah ba bala nembiak baka bebasaka pangan diri ti enda sama bansa enggau jalai pengarap.
Ku iya, ba taun tu PLKN semina ngambi 20,000 iku nembiak aja ari tagit 80,000 iku bepun ari penatai pemisi menua bisi bepenanggul mimit.
“Taja pan baka nya kitai agi ulih ngaga program tu lalu ngarapka ulih ditandu ba taun ke deka datai,” ku iya seraya madahka PLKN udah ngelatih lebih 800,000 iku nembiak sekumbang ke dipejalai 10 taun ke udah.