KUCHING: Orang dagang industri mit enggau jelan pemesai (IKS) Sarawak patut bebendar ngelakuka makit produk sida empu ngagai menua luar kena ngulihka untung ke besai agi.
Presiden Gerempung serakup Orang Dagang Mit enggau Jelan Pemesai Malaysia (IKHLAS) Mohd Ridzuan Abdullah madah, tu nyengkaum kerejasama enggau ejensi pengawa makit perintah baka piak Opis Dagang Betanam Betupi Perintah Besai (FAMA), Serakup Pemansang Asil Pengelandik Jari Malaysia enggau Majlis Amanah Rakyat (MARA) ke ulih mantu ngelakuka produk nya.
Kenu ku iya, pekara tu beguna amat laban produk sebaka ke dijual ba luar Sarawak nyata rega iya tinggi agi.
“Bisi barang asil pengelandik jari semina berega RM10 ditu, tang orang tengah nyual iya enggau rega RM100 ba endur bukai. Tu pekara ke patut diperati sereta diputarka kitai,” ku iya madah ngagai Bernama, apin lama ke udah.
IKHLAS sebengkah gempung ukai dikuasa perintah (NGO) ti ngemeranka pengawa nyaga hak orang dagang mit enggau jelan pemesai kelimpah ngiga jalai mutarka penanggul ke bekaul enggau pengawa dagang raban nya.
Ngenang silik pasal pekara nya, ku Mohd Ridzuan madahka ari pansik dipejalaika IKHLAS beratika pemar ditapi mai produk menua tu ngagai makit ke nyadi sekeda ari penanggul ke nyekat pemansang orang dagang IKS menua tu.
Ba Sarawak empu, pengawa makit tu beguna amat berindik ari nengeri tu kaya enggau bemacham asil kampung sereta ulih mansutka penatai pemisi baka produk pemakai, pengawa betanam betupi sereta asil pengelandik jari.
“Orang dagang IKS tu patut meri pemerat ke betul laban nadai ngira sektor nama dalam IKS, awak nya endang bisi. Tanah ke besai, peranak (ke mantu dalam aspek peminta) mega mayuh. Enti sida ngasilka seiti produk menua tu sereta dibeli bala komuniti, dagang sida sigi deka mujur,” ku iya. — Bernama