SERIAN: Kepala Menteri Datuk Patinggi Tan Sri Adenan Satem enda lantang ati enggau pemutus bekas Kaban Kunsil Nengeri (ADUN) pengelama lima penggal Datuk Frederick Bayoi Manggie ti nyadi chalun ngatika diri di Bukit Semuja, ba Pengawa Bepilih Besai DUN Sarawak Ke-11.
Ba penemu Adenan Bayoi ti udah tuai nya patut pichin, lalu ukai patut ngaga pemutus nyadi chalun ngatika diri ngelaban Barisan Nasional (BN).
“Bekaul enggau Frederick Bayoi, iya udah nyadi ADUN Kedup (enggau Tarat) beberapa penggal lalu iya udah pinchin, tang aku milih tauka meri rekomen iya nyadi Tuai Kunsil Opis Pelilih Mit Samarahan.
“Aku madahka iya (Bayoi), iya udah tuai lalu udah chukup (dalam politik), tang iya agi keran deka ngelaban kitai (BN).
“Aku chukup enda lantang ati enggau Frederick Bayoi, iya patut meri peluang ngagai orang biak Bidayuh ke bukai, tang iya milih deka bediri minta pilih,” ku iya.
Adenan mansutka pekara nya lebuh bejaku ba Pengerami Ketuai Begulai enggau Rayat ba Kpg Sorak Dayak ke diatur ba Dewan Mayuhguna, Kpg Sorak Dayak ditu, lemai kemari.
Bayoi udah gawa enggau Parti Pesaka Bumiputera Bersatu (PBB) pengelama 33 taun, udah ningkilka diri ari parti nya ketegal nama iya ditingkilka ari nyadi chalun.
Iya (Bayoi) kala nyadi ADUN Kedup pengelama tiga penggal tauka 15 taun berengkah ari taun 1996 nyentuk 2011, pengudah dua penggal nyadi ADUN Tarat.
Bayoi ti bediri minta pilih ngena tikit bediri nagtika diri ba Bukit Semuja deka betapi enggau chalun BN John Ilus; Edward Luak (DAP); John Aput (STAR) sereta Cobbold John Lusoi (PBDS Baru).
Berebak enggau tu Adenan nandu baru madah, nyema pan chalun ngatika diri menang iya tetap enggau pemutus enda nerima chalun nya ngagai BN.
“Enda ngira sapa bagi chalun ngatika diri ti minta pengundi anang nangi ngundi iya (chalun ngatika diri) laban ila masuk BN, saut aku ‘No’, nuan enda dipasuk ke dalam BN.
“Enti nuan menang nyadi chalun ngatika diri nadai utai ulih dikereja ba sitak dipegai nuan, semina enti nuan ari BN baru ulih ngatur ngereja utai ba sitak nuan.
“Kami (BN) enda beguna tauka enda minta Bayoi enggau kami (BN).
“Milih chalun tu begunaka proses panjai ukai ari mimpi lalu milih chalun, tang kami milih chalun ke ulih menang lalu kami udah tetemuka chalun kami iya nya John Ilus, chalun ke ulih menang,” ku iya.