Pengundi di Bukit Goram patut milih chalun BN dikena neruska pemansang

0
PENGGI NUAN: Nanta nyuaka tepa ngagai Jabu seraya dikemataka Zul enggau Jamit.

PENGGI NUAN: Nanta nyuaka tepa ngagai Jabu seraya dikemataka Zul enggau Jamit.

KAPIT: Sapit Kepala Menteri Sarawak, Datuk Patinggi Tan Sri (Dr) Alfred Jabu Numpang minta peranak Rumah Empawie Sawa sereta rayat bukai ke diau di sepanjai Sungai Ulu Yong ditu nyukung chalun Barisan Nasional (BN) Bukit Goram, Jefferson Jamit Unyat kena 7 Mei tu.

Iya nerang kebuah sida patut nulak chalun penyakal baka Parti Tindakan Demokratik (DAP) laban sida asal ari Semenanjung Malaysia.

Jabu diberi basa bejadika projek Jalai Bukit Goram/Jematan Sungai Ulu Yong sereta ngulu Program Ketuai Begulai Enggau Rayat ke diatur ba Rumah Empawie Sawa kira Satu kilometer penyauh ari Jematan Sungai Ulu Yong.

“Aku ngansak pengundi di N63 Bukit Goram ditu sampal ngundi chalun BN, Jefferson Jamit Unyat ke udah dipilih Kepala Menteri kitai, Datuk Patinggi Tan Sri Adenan Satem.

“Chalun ari Tim Adenan ke disukung bala ketuai renggat pun menua ngembuan rekod ke ulih nangkup peminta ba konstituensi nya,” ku iya nerang.

Ku Jabu nerang, Jamit tu endang ngembuan mayuh peneleba dalam politik. Nangkan ke nya, Jamit kala gawa nyadi Sapit Chairman Parti Pesaka Bumiputera Bersatu (PBB) Bagi Menua Kapit, Chairman Komiti Protem PBB-Bukit Goram, Sapit Kaunsilor Kaunsil Pelilih Kapit lalu diatu nyadi Sekretari Politik Kepala Menteri Sarawak.

“Sebedau Jalai Bukit Goram/Sungai Ulu Yong digaga, kandang menua tu jauh di entigis. Urung iya enam ngagai tujuh jam pejalai nitihka gaya penalam ai sungai endur ngelawa Sekula Primari (SK) Ulu Yong.

“Diatu semina 40 minit aja nengah jalai darat ari Pasar Kapit. Jalai tu udah digaga perintah. Projek tu berengkah ari simpang Jalai Bukit Goram ngelawa Sungai Ulu Yong urung tujuh kilometer penyauh. Lalu ari Jematan Sungai Ulu Yong ngelawa Rumah Jaduk tujuh kilometer.

“Tambah mega, Adenan bisi perambu ke besai ungkup peranak menua pesisir. Kepala Menteri (Adenan) enggau Menteri Besai (Najib), bela ngemeratka Program Transformasyen Menua Pesisir (RTC).

Perintah nengeri enggau perintah besai ngemendarka agih belanja ke besai ungkup pemansang menua pesisir. Baka kandang menua pesisir ke bukai, Bukit Goram mega begunaka mayuh projek pemansang dikena ngubah tikas pengidup rayat.

Nya alai ku Jabu nambah, dikena nentuka belanja ungkup program pemansang nya enda puntan, rayat patut milih pengari ke betul.

Jamit ari PBB ke nyadi tulang belakang perintah nengeri tu enti dipilih iya endang nyenggala ulih bejalaika projek nya.

“Nya alai maya pengawa bepilih tu, aku ngarapka semua pengundi di Bukit Goram nyukung Jamit awakka iya ulih menang enggau majoriti ke besai,” ku lalau Jabu.

Sama bisi bejaku maya nya, Sapit Menteri Pemansang Menua Pesisir enggau Kandang Menua, Datuk Alexander Nanta Linggi sereta chalun BN ungkup Bukit Goram, Jefferson Jamit Unyat.

Entara bala ke bisi datai, Sapit Residen Kapit, Zul Usup, Kepala Pengajar SK Ulu Yong, Mohd Sabli Badi, Pemesai Opis Pekara Khas (JASA); Peter Segie enggau Mohd Matan Yok, Chairman Serakup Anak Dayak Iban Sarawak (SADIA) Pampang Kapit, Edward Manggah, Penghulu Enggin Nyipa, Penghulu Nylong Daga sereta bala ke bukai.