Pengundi di Pakan diperansang nyukung chalun BN

0

JULAU: Tedong Gunda tauka mega dikelala enggau nama Chakaw ke kala bisi ati deka bediri minta pilih ba sitak Pakan, minta semua nembiak redak BN meri sukung penuh ngagai chalun ari Tim Adenan ba Pengawa Bepilih Nengeri ke sekali tu.

Tedong ti kala bediri minta pilih betengali alan ngena lambang SNAP nyatup chalun BN-SPDP, Tan Sri William Mawan Ikom ba pengawa bepilih nengeri taun 2011madah, diatu mih maya iya nyengkaum kaban SPDP sereta TERAS negutka kaul ngambi pulaika pemujur BN di Pakan.

Tedong ke udah ningkilka diri ari SNAP sereta nyadi kaban SPDP dalam taun 2012 madahka: “Sukung Tim Adenan, diatu maya TERAS enggau SPDP negapka kaul sida lalu begempung enggau kaban BN nyukung chalun BN,” ku iya.

Iya madah, penyarut ke nyadi antara TERAS enggau SPDP berebutka tikit BN ukai pekara baru, ku iya.

Diatu BN udah mujur ngerintaika chalun sida, lalu meri Mawan ti nyadi ex-presiden TERAS bediri nyadi chalun terus BN di Pakan, semua penyukung BN dilalau meri sukung sida iya kena 7 Mei tu ila.

Tedong mega nmadah lalu mantai ba Facebook ke alai iya nadai kaul agi enggau chalun ngatika diri, Dr Jawie Jenggot (ke kala nyadi kaban SPDP tang diatu udah ningkilka diri ari SPDP).

Iya mega madahka diri sepenemu enggau Kepala Menteri Datuk Patinggi Tan Sri Adenan Satem sereta Sekretari Besai BN Datuk Dr Stephen Rundi nyengkaum presiden PRS, Tan Sri James Jemut Masing, ke alai chalun ngatika diri nadai ediberi awak dalam BN taja pan sida menang ba PRN ke-11 tu ila.

Tedong ngelalau kaban BN di Pakan anang arapka jaku Dr Jawie ke alai iya deka dipasuk ke dalam BN enti sema iya menang ba PRN ke-11 tu ila.

“Kitai ke nyadi kaban BN enda tau enda konsisten, ngangkatka penaluk ba BN, sukung Tim Adenan ba barang endur kita,” ku Tedong.

Kena 7 Mei tu ila, Pakan deka diperebut nengahtiga penyuru antara Mawan (BN), Dr Jawier (Nagtika Diri) enggau Rinda Juliza Alexander (DAP).

Mawan ti mangku portfolio nyadi Menteri Pemansang Pengawa Rama, nyadi penyandang sitak Pakan.