Pengawa betanam betupi moden deka terus dikemansang dikena nyungkak penatai pemisi rayat nengeri tu
// Dikarang Rengenyan Labang //
GAWA BENDAR AGI: Uggah benung nerima chiri nyadi Menteri Kabinet Nengeri Sarawak ari ari Tuai Pemegai Menua Tun Pehin Sri Abdul Taib Mahmud, ensanus.
KUCHING: Sapit Kepala Menteri ke baru, Datuk Amar Douglas Uggah Embas deka numpu program lebih agi agenda ti udah disemaya ba pengawa bepilih besai nengeri (PRN) Ke-11 apin lama ulih chakah sereta mujur dipejalaika.
Iya ti berengkah nyadi sapit kepala menteri ari ensanus madahka diri deka bejalaika tanggungpengawa nya nitihka pematut.
“Keterubah iya, aku meri terima kasih ngagai Kepala Menteri (Datuk Patinggi Tan Sri Adenan Satem) ketegal bisi pengarap ngagai aku lalu nyirika aku nyadi seiku ari Sapit Kepala Menteri.
“Tu endang pengawa ti berat, lalu aku ke nyadi Sapit Kepala Menteri bejalaika tanggungpengawa nentuka program iya (Adenan) kelebih agi agenda ke udah ditetapka lebuh pengawa bepilih apin lama ulih dikereja.
“Nya sebengkah ari pengawa aku, lalu aku deka ngereja iya nitihka pematut,” ku iya ti mega dichirika nyadi Menteri Betanam Betupi Moden enggau Ekonomi Menua Pesisir.
Uggah mansutka pekara nya lebuh dikerandau raban pengarang berita pengudah Pengawa Beradat Angkat Sumpah Nyadi Menteri Kabinet Perintah Nengeri Sarawak ke diatur ba Begunan Kunsil Nengeri (DUN) lemai, ensanus.
Berebak enggau tu lebuh ditanya bekaul enggau portfolio iya nyadi Menteri Betanam Betupi Moden enggau Ekonomi Menua Pesisir, Ugah madah, portfolio iya nya nyau deka sebaka enggau portfolio iya dalam perintah besai sebedau tu.
Iya madahka deka chakah ngemansangka pengawa betanam betupi ngena chara moden di nengeri tu awakka ulih mantu nyungkak penatai pemisi rayat lebih agi orang bumai bekebun enggau menua.
“Aku diberi penerang tadi (ensanus), kitai nadai agi opis menteri pemansang tanah laban nya dipasukka dalam opis menteri ke dipegai aku diatu.
“Nyadi aku deka bejalaika pengawa betanam betupi. Pengawa betanam betupi tu endang beguna besai ngagai menua kitai ari segi penatai pemisi eksport, kelimpah ari program ngemunaska penyeranta dalam menua kitai.
“Sebengkah ari pekara ti dikemeratka aku iya nya deka nentuka orang betanam betupi di serata nengeri tu teulihka penatai pemisi enda kurang ari RM4,000 sebulan lebuh manggai 2020,” ku iya.
Uggah madahka opis menteri iya deka nyadi sebuah opis menteri ti nyadi pemangkin dikena nentuka transformasyen menua pesisir.
Nya alai iya madahka diri deka beratika nama pengawa ke patut dikereja dikena nyikap sistem betanam betupi moden, iya nya nukar chara lama ngagai chara ti lebih moden sereta ngena injin.