Dikarang Chris Bishop//
KOTA SAMARAHAN: Sapit Kepala Menteri Datuk Amar Abang Johari Tun Openg netapka pemujur Barisan Nasional (BN) ba pengawa bepilih ke udah nyadika tenggau ungkup ketuai nengeri ke diatu ngambi beratka pekara pelajar.
Ku iya, Sarawak patut bisi chara kediri empu ba pengawa ngemansang pekara pelajar di tanah Kenyalang nitihka penengkeman peranak nengeri.
“Pekara pelajar nyadi sebengkah sektor ti dikemerat ke nyadi pekara lumur satu dikemata Perintah Nengeri. Kitai meseti bisi chara kediri empu ngemansang pekara pelajar.
“Keterubah, kitai udah ngaga pemutus dia Yayasan Sarawak deka bejalaika tanggungpengawa numbuhka palan pelajar tinggi di nengeri tu ngambika nembiak Sarawak ulih nampung pelajar sida ngagai ikas ke tinggi lalu pengelandik nya diakun ba renggat global,’ku iya.
Abang Johari mansutka jaku nya rambau bejadi pengerami Hari Pengajar Renggat Nengeri Sarawak 2016 ke diatur di DeTAR Putra UNIMAS ngarika Kepala Menteri, Datuk Patinggi Tan Sri Adenan Satem.
Iya ke mega Menteri Pengawa Berumah enggau Kandang Mengeri sereta Menteri Dagang Temuai, Seni enggau Main Asal nambah, ketegal beratka pekara pelajar, pengelandik nguasa Bahasa Malaysia enggau Inggeris diakun sebengkah chara ti ulih nyapai juluk nya.
“Tu mih juluk kitai, kita dekaka nembiak kitai laku, lalu mega keran deka ngangkat standard pelajar kitai ngambika sida (nembiak) ulih besemekih ba renggat global,’ku iya.
Pekara kedua ti dikearap ulih mantu nyapai juluk nya ku Abang Johari, iya nya penyanggup Perintah Besai nambahka mayuh agi nembiak Sarawak ba palan pematih pengajar di nengeri tu.
Ba pengawa nya Abang Johari mega bisi ngenataika teks jaku Adenan ti madah Pengerami ngintu Hari Pengajar 2016 nyadi seiti pengawa ngerami pemujur bala pengajar ti udah ngajar nembiak nengeri tu.
Adenan madahka tanggungpengawa pengajar ba abad ke-21 chukup dipebasa lalu diakun ukai semina nyadi penyadung penau,injinir sosial, penegap penyerakup, pengansah runding tang mega nyadi agen ubah.
“Ba proses tu, pengajar patut ngaga transformasyen ba chara ngajar ke ditempuh nembiak lalu patut beratka ubah kognitif, afektif enggau psikomotir kelimpah ti belajar chara koboratif, koperatif lalu nguna semua penau ke dipelajar,”ku Abang Johari.
Ba pengerami nya Direktor Opis Pelajar Sarawak ke dulu suba Datu Dr Julaihi Bujang dipilih nerima gelar ‘Tokoh Kepimpinan Pendidikan Sarawak 2016’ ke alai Mastura Anuar ,60, dipilih nerima gelar ‘Tokoh Guru Sarawak 2016’.