SIBU: Terubah iya, Gina Production Studio (GPS) ke bepengkalan di Miri ngeluarka album Gawai taun tu.
Menijar Besai GPS Gina @ Regina Patrick madahka, nama album Gawai sida sekali tu iya nya’Selamat Hari Gawai’(Gaga Ati Pulai Gawai) ke berengkah digaga pengujung bulan Febuari tu tadi.
Ku iya, album Gawai GPS tu mayuh ngangkatka bala penanyi baru ke ditempa GPS empu.
Entara bala penanyi dalam album tu iya nya Gina Regina, Fereny Minea, Ivy Ubang, Leonard M, Justin Ong, Fabian Fab, Billy Johnson, Steve Giri J, Sheila Ming, Ren, Anter, Joe Morrison, Melvin enggau Jang Pegari.
“Berindik ari tu keterubah iya GPS ngeluarka album Gawai, aku ngasaika album tu ulih ‘nyengat’ sereta besemekih enggau album gawai ari kompeni rikoding ke bukai di nengeri Sarawak.
“Ukai muntang deka ngasilka album Gawai tu laban iya nelan ungkus belanja ke besai sereta GPS teulihka pemujur pengudah lama ngining deka ngaga album Gawai diri empu,” ku iya madah ngagai Utusan Borneo, apin lama ke udah.
Regina madahka, komposer ke bisi ngaga lagu dalam album tu iya nya Gina, Ganing Assan, Billy Johnson enggau Joe Morrison.
“Aku ngasilka tujuh buah lagu nyengkaum leka lagu lalu ke bukai ditengkebang Ganing Assan, Billy Johnson enggau Joe Morrison ke bela bekunsi penemu enggau aku ngemujurka pengawa ngaga album tu,” ku terang iya.
Album tu ngundan 11 buah lagu; Selamat Ari Gawai disadaka penanyi GPS bebala mayuh, Begawai Enggau Lantang Ati (belagu bebala mayuh artis GPS), Gaga Ati Pulai Gawai (Gina), Selamat Gawai Wai (Fereny), Aram Meh Rami Begawai (Melvin), Anang Enda Pulai Begawai (Ivy), Joget Nyambut Temuai (Billy & Fabian), Anang Ringat Pulai Begawai (Ren & Sheila), Ngiga Bini Maya Gawai (Leonard & Justin), Bebaik Tua Anang Belaya (Lisa & Steve) sereta Jimat-jimat Tua Ngabang (Anter & Joe).
Semua pengawa ngaga klip video album tu digaga ba Rumah Panjai Goa Bakam, Miri lalu ngena awak pengelama empat minggu tembu.
Bala penari ari Sri Tari Bumi Kenyalang, Miri udah ngerichahka agi pengawa ngaga klip video nya.
Brenda Yeo, seiku pengemeran seni pemadu biak dipadu GPS nyadi pengatur video/jurukamera/master/programming enggau kulit album Gawai sida nya.
Album tu udah dilancharka pun bulan April tu tadi bepalan ba Kumang Cafe Miri bela digulu bala artis ke bisi dalam album nya.
Berebak enggau pengawa ngelancharka album Gawai nya, GPS mega ngelancharka album kompilasi dangdut GPS benama ‘Pengerindu Dangdut’ ke disadaka Gina, Sheila enggau Ren.
Album tu ngundan 10 buah lagu iya nya Mabuk Pengerindu disadaka Gina, Ketegal Nuan (Ren), Enggai Ke Putih Mata (Sheila), Kapa Aku Jugau (Gina, Ren & Sheila), Enggai Aku Enggai (Gina), Anang Nuan Kelalu Ambai (Ren), Enggai Janda Kedua Kali (Sheila), Selamat Pengantin Baru (Gina), Aku Tu Dara Tuai’ (Ren) sereta Bula Madah Diri Enggai (Sheila).
Ba album tu, GPS ngangkatka dua iku penanyi baru iya nya Ren peranak Kapit enggau Sheila ari Song lalu tu mega album keterubah seduai.
Album Gawai enggau album kompilasi Dangdut udah bisi ba makit kenyau hari tengan bulan April tu tadi.
Kenang ke bukai, ku Gina, kededua album tu bela nerima timbal ke chukup manah ari bala peminat kelebih agi sida di Miri enggau Sibu.
Iya mega meri besai terima kasih ngagai bala artis kelebih agi ngagai Joe Morrison enggau Jang Pegari ke datai ari Sibu laban udah begulai ngemujurka album Gawai GPS sekali tu.
“Aku meransang bala peminat ke apin meli album Gawai enggau album kompilasi Dangdut lalu beli iya ke tulen kena kitai nulak penyalah chelak tiru.
“Enggau awak tu, aku meri Selamat Gawai Dayak Gayu Guru Gerai Nyamai ngagai semua kaban artis, piak media enggau peminat ke udah mayuh meri sukung ngagai GPS ngelama tu,” ku iya nambah baru.